Á nomina de vacinas que se están xestando para combater a pandemia é preciso sumar un novo nome: HIPRA. A empresa española recibe hoxe boas noticias, despois de que a Agencia Española de Medicamentos e Productos Sanitarios (AEMPS) autorizara o inicio da fase III de ensaios clínicos. É dicir, a etapa definitiva. Para iso, contarase coa participación de 3.000 voluntarios maiores de 16 anos e coa colaboración de 17 hospitais españois, dous portugueses e un italiano. Segundo informa a Agencia SINC, comprobarase a seguridade e eficacia desta nova vacina como dose de reforzo para outras pautas de vacinación primarias. Un paso previo para que a Axencia Europea de Medicamentos (EMA) dea o seu visto bo.
Máis polo miúdo, as persoas que vaian participar no ensaio teñen que ter unha ou dúas doses das vacinas autorizadas de Pfizer, Moderna, AstraZeneca, Janssen ou combinadas, como mínimo hai tres meses. E a todos os participantes se lles fará un seguimento de 52 semanas, aínda que se poderán obter datos relevantes antes dese prazo. Ademais, o estudo será avaliado polo Comité de Ética do Hospital Clínic de Barcelona e pola AEMPS.
Boa resposta inmunitaria
Por outra banda, durante o deseño desta vacina xa se tiveron en conta as diferentes variantes, ofrecendo unha boa resposta inmunitaria na fase preclínica. Ademais, os datos apuntan a unha protección axeitada fronte a ómicron. A diferenza doutro tipo de inxeccións, esta consérvase entre dous e oito grados centígrados e non precisa de ningún tipo de preparación.
A ministra de Ciencia e Innovación, Diana Morant, destacou onte que esta vacina, ao estar baseada nunha plataforma de recombinación de varias proteínas, “pode ir adaptándose ás distintas variantes”. As previsións de HIPRA, con sede en Girona, é que a inxección estea lista antes do verán. En 2022, a farmacéutica terá unha capacidade produtiva de 600 millóns de doses, segundo os seus cálculos.