Premio Arquímedes para un estudante de Matemáticas de Santiago

O alumno da Facultade de Matemáticas David Mosquera Lois fíxose con dous dos premios Arquímedes convocados polo Ministerio de Educación. Nesta vixésimo sexta edición, o estudante da USC acadou o segundo premio na Área de Ciencias Experimentais, Exactas e Ambientais –dotado con 5.000 euros– e un especial consistente nunha estancia de dúas semanas nun centro de investigación do CSIC.

Os Premios Arquímedes teñen como obxectivo fomentar o espírito investigador do alumnado universitario mediante a concesión de premios a traballos de investigación. Dos máis de 300 presentados, o xurado seleccionou 25 finalistas –entre eles David Mosquera– dos que saíron os gañadores nas catro ramas de coñecemento: Ciencias Experimentais, Enxeñaría, Ciencias Biomédicas e Ciencias Sociais e Humanidades.

Publicidade

David Mosquera concorreu co traballo de fin de máster ‘Integración con respecto á característica de Euler-Poincaré’ que lle dirixiu  o profesor Enrique Macías Virgós, do Departamento de Matemáticas da USC, na especialidade de ‘topoloxía alxebraica aplicada’. Nel investiga o uso de técnicas topolóxicas avanzadas para estudar problemas tan diversos como o reconto de persoas presentes nun momento dado nunha sala de aeroporto a través de cámaras, o número de ordenadores conectados a unha rede sen fíos, a detección de vehículos circulando por estradas ou o cálculo do número de réplicas dun terremoto. O traballo supón tamén un desenvolvemento teórico dalgunhas desas técnicas.

O estudante, que se mostrou “moi satisfeito” por ver “recoñecido o meu traballo de todo un ano”, realizou o grao e o Máster de Matemáticas na USC, e na actualidade está comezando o seu doutoramento.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

É máis doado gañar o premio gordo da lotería de Nadal que estar vivo

A probabilidade de acadar a gran recompensa do día 22 cun so boleto é dunha entre cen mil, mentres que a de nacer é dunha entre cen millóns

Un método matemático galego axuda a controlar os niveis de glicosa en diabéticos

O sistema desenvolvido polo CITMAga estase a aplicar para predicir o crecemento de tumores e optimizar terapias contra o cancro

Un proxecto escoita os sons do mar para caracterizar o fondo do litoral galego

A información achegada polos investigadores do CITMAga sobre o estado do leito mariño axudará a cuantificar a presenza e a concentración de bivalvos e a saúde dos seus ecosistemas

Matemáticas con selo galego para enfrontar o reto das futuras pandemias

O investigador Juan José Nieto Roig coordina en Galicia un proxecto que conta coa participación dalgunha das mellores universidade do mundo