O Proxecto de Investigación Stephen Hawking convocado polo instituto de ensino secundario Rosalía de Castro de Santiago tentará repetir o éxito dos premios literarios San Clemente. Agora este novo proxecto pretende achegar o mundo da ciencia aos mozos a través dun traballo científico que, nesta primeira edición, está dedicado á evolución humana en relación coa área de estudo do seu director, o paleontólogo Ignacio Martínez Mendizábal.
«Pareceunos moi positivo que fosen os investigadores os que premiasen aos estudantes e non ao revés», explicou Martínez Mendizábal durante a rolda de prensa celebrada no instituto compostelán. O proxecto virará ao redor duns eixos determinados, como o coñecemento do patrimonio natural galego, xa que «permite desenvolver aptitudes científicas», ou o estudo da influencia dos factores físicos e químicos do medio ambiente, asegurou o seu director.
Unha das competencias máis interesantes que se lles esixirá aos participantes será o estudo da relación emocional coa natureza, un aspecto novo que potenciará a «faceta artística» dos estudantes.
A temática será a evolución humana, área de estudo do paleontólogo
Ignacio Martínez Mendizábal, paleontólogo, doutor en bioloxía e máis coñecido polas súas investigacións en Atapuerca, que lle valeron o premio Príncipe de Asturias en 1997, escolleu como tema de estudo a evolución humana, algo no que é todo un experto. Con todo, para próximas edicións, a temática irá cambiando «en función do científico».
A convocatoria vai dirixida a alumnos de 4º de ESO e 1º de Bacharelato dos cinco institutos de secundaria elixidos, aínda que se espera que polo menos outros catro ou cinco centros europeos poidan sumarse ao proxecto. Os estudantes, ademais de presentar a investigación realizada, incluirán unha «proposta de actuación», tal e como comentou Martínez Mendizábal, para «dar a coñecer o que fixeron» á cidadanía.
Na presentación estiveron os representantes dos cinco centros de secundaria elixidos mediante sorteo para participar no Proxecto de Investigación Stephen Hawking, apadriñado polo famoso astrofísico, que durante o pasado ano ofreceu unha conferencia no instituto santiagués. Hawking considerou «toda unha honra» utilizar o seu nome, segundo dixo o director do IES Rosalía de Castro, Ubaldo Rueda. «Tentaremos que estea na entrega de premios», dixo.
A finais do próximo curso escolar darase a coñecer o nome dos tres finalistas e do gañador, aínda que a contía económica do premio aínda está por decidir. Os profesores dos institutos participantes consideran que se trata de «unha proposta moi atractiva» que esperan que «dure moitos anos máis».
