A editorial Kalandraka, especializada en literatura ilustrada infantil e xuvenil, presentou recentemente dúas obras de divulgación dirixidas aos máis cativos. Viaxeiros. Animais extraordinarios e Inventario ilustrado de froitas e verduras achegan á infancia e mocidade dous aspectos clave para coñecer mellor o noso entorno.
Viaxeiros. Animais extraordinarios
O libro, segundo explica Kalandraka, “permite acompañar os animais que por terra, mar e aire realizan as viaxes máis longas e arriscadas”. Travesías de de milleiros de quilómetros, cruzando continentes e océanos, entre onde pasan o inverno e a súa residencia de verán, ou dende as zonas de cría ás de alimentación. Outros fan traxectos curtos pero expoñéndose a toda clase de perigos e situacións.
A obra afonda, por tanto, en “asombrosas aventuras que poñen a probaa resistencia de cada criatura, a súa obstinada determinación e capacidade de orientación”.
Viaxeiros é unha obra escrita por Xulio Gutiérrez, ilustrada por Nicolás Fernández e traducida por Chema Heras.
Inventario ilustrado de froitas e verduras
Neste caso, o libro, escrito por Fernando Moreiras, reúne un cento de alimentos, que se poden comerc crus ou cociñados, entre os que están froitos, talos, bulbos, raíces, sementes, follas, flores, etc. e mesmo produtos, como tés, cafés, marmeladas ou chocolates, que se obteñen a partir das materias primas. No traballo tamén se afonda nas diversas clases de vexetais, como as drupas (que teñen carabuña), as bagas (sen carabuña, pero con unha ou máis pebidas), os froitos con casca (como as noces), os cítricos, os legumes, as herbáceas e os tubérculos.
