O Hub Europeo de Innovación Dixital EDIH DATAlife lanza o curso Saúde Dixital: introdución aos sensores conectados no sector da saúde e os servizos sociosanitarios, unha formación pioneira que mostrará como a Internet das Cousas (IoT), a sensórica e a intelixencia artificial (IA) poden transformar a prevención, o diagnóstico, o seguimento e a xestión asistencial en Galicia.
O curso celebrarase os días 26 de novembro, 3 e 10 de decembro, con formato híbrido: a primeira sesión será presencial nas instalacións de Mestrelab Research, en Santiago de Compostela, e incluirá unha comida networking; as dous seguintes poderán seguirse tanto de forma presencial como en liña. A docencia correrá a cargo de José Carlos López Ardao e Juan Santos Gago, profesores e investigadores da Universidade de Vigo e o centro atlanTTic, especialistas en redes de comunicacións, IoT e Smart Health.
Tres sesións e un amplo programa
Durante as tres sesións, os participantes coñecerán os fundamentos do IoT, os tipos de sensores biomédicos e ambientais máis empregados, e as tecnoloxías que os conectan (Bluetooth, Wi-fi, 4G/5G ou LoRaWAN). Ademais, abordarase como estes dispositivos, combinados con algoritmos de IA e machine learning, permiten monitorizar pacientes a distancia, previr riscos de saúde e optimizar recursos sanitarios.
O programa inclúe demostracións prácticas e casos de éxito sobre monitorización de pacientes, xestión hospitalaria intelixente ou asistencia a persoas maiores e dependentes. Tamén se analizarán os pasos clave para implantar solucións IoT en contornas sanitarias, desde a selección de sensores ata a integración con plataformas e a avaliación do desenvolvemento.
A iniciativa forma parte do catálogo formativo do proxecto EDIH DATAlife, cofinanciado pola Comisión Europea e o Ministerio de Industria e Turismo a través do programa Dixital Europe. Nesta ocasión, participan na organización do curso FEUGA, o Clúster Saúde de Galicia (CSG), a Universidade de Vigo, o centro atlanTTic, Mestrelab Research e a asociación DIH DATAlife.
Público obxectivo
O curso é gratuíto, con prazas limitadas, e está dirixido a profesionais do ámbito sanitario e sociosanitario, así como a enxeñeiros biomédicos, desenvolvedores de solucións de saúde dixital e técnicos de innovación que desexen coñecer as oportunidades que ofrece a transformación tecnolóxica no sector.
As inscricións poden realizarse a través da web de EDIH DATAlife.
Esta nova formación súmase aos outros catro cursos que xa realizou o proxecto centrados no sector sanitario e sociosanitario durante 2024 e 2025. As temáticas dos anteriores foron: O uso da IA para extraer valor da historia clínica, Aplicación práctica dos sistemas intelixentes no ámbito sanitario, Aplicacións de aprendizaxe automática en saúde e Recompilación e integración de datos nos sectores saúde e biotecnoloxía. Todos eles poden consultarse na web do proxecto e acceder aos seus materiais e gravacións na aula virtual que habilitaron en colaboración co Centro de Supercomputación de Galicia (CESGA).
