A Academia de Ciencias premia o IES Rosalía de Castro de Santiago polo seu labor divulgativo

A RAGC valora o proxecto educativo do instituto no fomento da cultura científica e tecnolóxica e outorga o galardón por unanimidade 

Imaxe dos premios Stephen Hawking que se celebran no IES Rosalía de Castro.
Imaxe dos premios Stephen Hawking que se celebran no IES Rosalía de Castro.

A Real Academia Galega de Ciencias (RAGC) concede “por unanimidade” o Premio RAGC de Divulgación Científica 2023 ao centro de ensino público IES Plurilingüe Rosalía de Castro de Santiago de Compostela. A Academia recoñece así “o proxecto educativo do instituto no fomento da cultura científica e tecnolóxica”. 

“O Instituto Rosalía de Castro ten como obxectivo que o seu alumnado cultive a curiosidade e desenvolva habilidades para a indagación e a investigación. Deste xeito, senta as bases dunha cultura científica entre o estudantado da ESO, Bacharelato, STEAMbach, ciclos de FP e ESA, que lles permite acceder de xeito máis doado á investigación na universidade. Este ideal faise explícito nun programa científico notable con moitas actividades como o Premio Stephen Hawking, para alumnado de Bacharelato de centros galegos; o Premio IN: innovación, investigación e invención, para estudantes da ESO; e a participación relevante na Semana da Ciencia ou no Rally Matemático sen Fronteiras. Debemos destacar que no ano 2009 celebrouse no instituto o certame internacional Ciencia en Acción e que o alumnado do centro participa frecuentemente nas Olimpiadas Científicas, no Certamen de Jóvenes Investigadores ou no Día da nena e a muller na ciencia”, salientan os membros do xurado da RAGC. 

“Unha premisa do centro é que a ciencia e a tecnoloxía son piares fundamentais do desenvolvemento da sociedade actual; ciencia e tecnoloxía son unha parte máis dunha formación que inclúe competencias lingüísticas, humanísticas, artísticas e solidarias. Así se recolle nos diferentes proxectos que se lles ofrece ao alumnado, que se familiariza coa ciencia desde os primeiros anos do instituto. Con este galardón, a Real Academia Galega de Ciencias quere tamén valorar o traballo nos centros de Secundaria á hora de captar vocacións e estender este recoñecemento a todos os institutos que inclúan este ideal no seu traballo diario”, manifestan desde a RAGC.

Empezar a investigar dende cativos

Pola súa parte, o director do IES Rosalía de Castro, Xavier Mouriño, salienta que desde o centro “apoiamos e animamos aos rapaces e ás rapazas para que empecen a investigar. Poñemos as primeiras pedras co propósito de que aprendan desde a base. Estamos moi satisfeitos e orgullosos do noso alumnado e dos nosos docentes, que alimentan a súa curiosidade, pero tamén de todo o alumnado galego, que participa en moitas das nosas actividades como o Premio Stephen Hawking, con centros de ensino Secundario procedentes de toda Galicia. Detectamos un nivel excepcional dos traballos que se presentan en cada edición. Sorpréndennos ver como se achegan á investigación, a súa orixinalidade nos contidos e na presentación”. O director pon de relevo que o premio da Academia Galega de Ciencias é “un recoñecemento de todos os centros galegos que traballan por espertar vocacións científicas entre os rapaces e rapazas”.

O xurado desta edición estivo composto polos académicos da RAGC Ángel Carracedo, que actuou como presidente; Minia Manteiga como secretaria; ademais de Antonio Ballester, Antonio Rigueiro e José Ramón Cancelo.  

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.