A provincia de Pontevedra bateu este xoves o seu récord histórico de temperatura máxima, alcanzando os 24,3 graos, superando amplamente o maior rexistro previo, cifrado en 22,1 graos.
Os termómetros están disparados estes días en toda Galicia, nunha situación anormal en pleno inverno. Un sistema de altas presións sobre Europa, xunto á borrasca situada no Atlántico, fan que os ventos do sur leven aire cálido subtropical ata Galicia.
En case todo o país as temperaturas estiveron 12 graos por riba do habitual nesta época do ano. A situación coincide co que sucede no resto de Europa, sobre todos nos países nórdicos, onde os termómetros están situados en 12 graos máis que a temperatura habitual nesta data do ano.
A monster blocking ridge will develop and dominate Europe this week:https://t.co/p5kuKZKA9l
— severe-weather.EU (@severeweatherEU) 13 de febrero de 2019
De feito, algúns analistas meteorolóxicos empregan a expresión ‘monstro‘ para referirse á masa de aire quente que está a ocupar boa parte de Europa, utilizando así unha analoxía co chamado ‘monstro de xeo’ que o ano pasado afectou ao continente provocando grandes nevaradas e problemas nas comunicacións. Nesta ocasión o ‘monstro’ chega cálido.
En Galicia, a situación anticiclónica vai mudar nos vindeiros días, ao entrar unha borrasca ao longo deste domingo, que traerá choiva, baixada das temperaturas e mesmo neve en cotas a partir dos mil metros.
