Illas Cíes, un ecosistema na fronteira: o legado da investigación científica no arquipélago

Un libro recolle, en formato divulgativo, o traballo do comité científico, composto por expertos das universidades galegas, CSIC, IEO e outros colaboradores

Vista aérea das Illas Cíes. Foto: Concello de Vigo.
Vista aérea das Illas Cíes. Foto: Concello de Vigo.

A candidatura das Illas Cíes ao Patrimonio Mundial da Unesco presentou a pasada semana unha publicación científica que recolle as investigacións realizadas por un equipo de máis de 20 investigadores nos últimos anos. O texto, que pode descargarse na rede, é froito do traballo de expertas e expertos pertencentes ás tres universidades galegas, o Instituto de Investigacións Mariñas do CSIC e o Centro Oceanográfico de Vigo (IEO), coordinados por Emilio Fernández, catedrático de Ecoloxía da Universidade de Vigo, e Carlota Barañano, oceanógrafa e membro do comité da candidatura das Illas Cíes ao Patrimonio da Humanidade.

O traballo conta coas achegas dun bo número de investigadores, que abordan o arquipélago desde a perspectiva bioxeográfica, o patrimonio xeolóxico, os hábitats e especies terrestres, costeiros e mariños das Cíes, os procesos ecolóxicos que se desenvolven nas illas, a paisaxe, as ameazas, impactos e vulnerabilidades fronte ao cambio global e a ocupación e usos humanos que se desenvolveron neste enclave ao longo da historia.

As Illas Cíes, separadas do continente desde hai poucos miles de anos, sitúanse nun sistema de  afloramento costeiro altamente produtivo, nunha zona de fronteira entre  biorrexións, o que permite ilustrar diversos procesos de grande interese ecolóxico e evolutivo que derivan da interacción entre sistema mariño e terrestre, e convérteas nun observatorio excepcional dos procesos de cambio ambiental de escala global que experimenta o planeta.

Tal e como se destaca na introdución da obra, as Cíes sobresaen como ecosistema pola súa conformación xeolóxica (cantís, praias, sistemas dunares ou lagoas), a diversidade e produtividade dos seus hábitats mariños, cunha presenza representativa da fauna e flora atlánticas, o interese pesqueiro das especies que habitan nas súas augas ou a relevancia dos cantís e demais enclaves para a nidificación de aves mariñas. Xunto a isto, a importancia histórica e cultural das Cíes conforma un territorio de gran valor patrimonial, destaca o libro.

A obra está auspiciada polo Concello de Vigo, co obxectivo de recoller todo o coñecemento científico existente publicado ata decembro de 2018 sobre as Illas Cíes, obtido a través da revisión bibliográfica exhaustiva e posterior análise da información recompilada por parte de especialistas de diversas disciplinas, e reforzando así o aval científico da candidatura á UNESCO.


O libro pode descargarse en formato PDF nesta ligazón.

 

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.