Galicia, declarada oficialmente libre de brucelose bovina

Este martes 19 de setembro, Galicia quedou oficialmente libre de brucelose bovina, unha enfermidade infecciosa que provoca numerosos abortos e debilidade nas crías. A Comisión Europea, a través do seu comité permanente da cadea alimentaria e sanidade animal, tomou a decisión baseándose nos criterios marcados pola normativa comunitaria. Segundo declarou a conselleira de Medio Rural Ánxeles Vázquez, precisamente de visita en Bruxelas, “Galicia levaba seis anos sen positivos”. Así, este anuncio supón “un fito de gran importancia para o sector gandeiro galego”, tanto na perspectiva sanitaria como na económica, engadiu Vázquez.

A loita contra esta patoloxía é unha liña prioritaria para a Unión Europea desde hai decenios. Desde a súa entrada no mercado común, España recibe financiamento e axuda para erradicar a doenza no seu gando e leva a cabo, anualmente, plans estatais de erradicación. En 2016, País Vasco, Navarra, La Rioja, Murcia, Canarias e Baleares estaban oficialmente libres da brucelose bovina, zonas ás que se lle sumaron a comezos deste ano as provincias de Asturias, Burgos, Soria e Valladolid. Agora, Galicia súmase a esta lista.

Publicidade

Ánxeles Vázquez estendeu a súa felicitación aos gandeiros galegos e aos técnicos que traballan sobre o terreo, en agradecemento ao esforzo realizado. Como elementos clave, subliñou o rexistro de explotacións bovinas, a identificación individual dos animais e o rexistro de movementos pecuarios. Ademais, a Xunta de Galicia ofreceu tres liñas conxuntas de axudas ás explotacións afectadas para o sacrificio dos animais afectados, o control de pastos e a desinfección que se debía realizar nos casos positivos.

Agora, os esforzos de Medio Rural no sector bovino centraranse na tuberculose, da que se seguen rexistrando casos en Galicia, toda vez que, desde 2013, o noso país tamén está libre de brucelose ovina e cabrúa.

Publicidade

Que é a brucelose bovina?

Coñécese por brucelose bovina un conxunto de infeccións causadas por bacterias do xénero Brucella. En Galicia e España, a maioría dos casos están provocadas pola Brucella abortus e, en moita menor medida, pola Brucella melitensis. Clínicamente, caracterízase pola presenza de abortos, nacemento de crías moi febles, retención de placenta ou inflamación de testículos.

En ocasións pode transmitirse ao ser humano, por contacto directo con animais afectados. Nestes casos, caracterízase por febre intermitente, dor de cabeza, astenia, sudación e malestar xeral.

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

Tecnoloxía e psiquiatría únense para crear un banco de datos para investigar a saúde mental na adolescencia

Un equipo de atlanTTic, xunto con profesionais sanitarios, desenvolve VisIA-Q, un conxunto de información clínica e psicométrica de 207 adolescentes

A galega Gradiant desenvolve un modelo de atención integrada para os pacientes con feridas crónicas

A ferramenta creada polo centro tecnolóxico, en colaboración co IIS Galicia Sur, busca ofrecer unha asistencia máis personalizada, coordinada e eficiente

Vigo impulsa o uso pioneiro da realidade virtual para mellorar a recuperación tras un transplante de médula

O proxecto do IIS Galicia Sur e o Hospital Álvaro Cunqueiro combina exercicio terapéutico e tecnoloxía para combater a deterioración física e emocional

A borrasca subtropical Charles regará Galicia con fortes chuvias durante o mércores

A nova zona de baixas presións tomará o relevo de Bruna e MeteoGalicia establece a alerta amarela en Ourense por precipitacións