Os Museos Científicos Coruñeses celebran do luns 12 ao domingo 18 de novembro, sete días de portas abertas con motivo da Semana Internacional da Ciencia. Durante esa semana a entrada será gratuíta na Casa das Ciencias, Domus e Aquarium Finisterrae, ofrecendo á cidadanía a ocasión de visitar as súas exposicións e participar nas numerosas experiencias interactivas que propoñen estes centros de ciencia.
O momento culminante da semana será o sábado 17 de novembro, no que se celebrará a entrega dos Prismas á Divulgación. O venres 16 está programada a presentación do libro Científicas. De la fuerza del rayo a la hélice de la vida, de Jorge Bolívar, gañador do Prisma 2017 ao mellor texto inédito, e que acaba de ser editado pola editorial Guadalmazán. Posteriormente, catro científicas e divulgadoras de prestixio participarán na tertulia titulada “Cando elas contan: divulgación científica en feminino”.
Programa completo da Semana da Ciencia:
– Do 12 ao 18 de novembro. Portas abertas na Casa das Ciencias, Domus e Aquarium Finisterrae, de 10 a 19 horas (o Aquarium pecha o acceso ás 18 horas).
– 14 de novembro. Conversas coa ciencia. Coloquio dirixida por Manuel Vicente, coa participación das investigadoras coruñesas Estela Area Gómez,profesora asistente no departamento de Neuroloxía da Universidad de Columbia, e Sandra Barral Rodríguez, profesora asociada de Neuroxenética daUniversidad de Columbia. Na Domus, ás 19.30 horas. Entrada libre ata completar capacidade.
– 16 de novembro. “Cando elas contan: divulgación científica en feminino”. Mesa redonda e presentación do libro Científicas. De la fuerza del rayo a la hélice de la vida, de Jorge Bolívar. Na Domus, ás 19.30 horas. Entrada libre ata completar capacidade.
– 17 de novembro. Actos de entrega dos XXXI Prismas Casa das Ciencias á Divulgación.
– 11.00 horas, na Domus. Presentación dos traballos gañadores dos Prismas 2018. Entrada libre.
- Mellor traballo en vídeo: “El reloj interno”, presentado por Pere Estupinyà.
- Mellor sitio web/rede social: “Gaussianos”, blog presentado por Miguel Ángel Morales Medina.
- Mellor libro editado:“¿Funcionan las vacunas?”, orixinal de Ignacio López-Goñi e Oihan Iturbide, da editorial Next Door Publishers.
- Mellor artigo xornalístico: “Se vende animal extinto por un euro”, orixinal de Nuño Domínguez e publicado no diario El País.
- Mellor traballo en radio: “Radioscopio: viaje a Lovaina”, presentado por Susana Escudero Martín, Emilio J. García Gómez-Caro e José M. Álvarez Estévez, emitido en Radio Andalucía.
- Prisma Especial do Xurado:Clara Grima Ruiz.
– 13.00 horas. Entrega dos Prismas 2018. Salón de plenos do Concello da Coruña.
