Nun momento de dificultades para a ciencia, con recortes, problemas administrativos e a crónica falta de medios que afectan aos investigadores, cómpre reflexionar sobre a importancia que a investigación ten para a sociedade. O traballo dos científicos non chegou a acadar en Galicia nin España a importancia social e económica que si se lle recoñece na maioría dos países da contorna. E ante isto, a necesidade de que as novas xeracións se marquen como obxectivo ser científicos é unha meta que deben perseguir nas sociedades avanzadas. Nesta liña xorde ‘Mocidade, ciencia, futuro’, a nova exposición que se pode ver xa na Domus da Coruña.
A mostra recolle os testemuños de investigadores mozos e outros cunha traxectoria longa e consolidada
A mostra aborda 20 temas, que analizan desde diferentes perspectivas a importancia dos científicos e científicas para o conxunto da cidadanía. Contou coa colaboración de de mozos e mozas dedicados á investigación e vinculados á Coruña, que contan as súas experiencias profesionais. E tamén se recollen os relatos de expertos consolidados, como Marisol Soengas, Sonia Villapol ou Xosé R. Bustelo.
O escenario da exposición está formado por sete prismas de base triangular nas que se presentan os temas Ciencia no exilio, Un traballo para vivir, O éxito non ten idade, Unha perspectiva histórica, O empuxe da ciencia, Vocacións en crises, Toda a ciencia é útil, Do laboratorio á industria, A ciencia interesa, Ciencia para todas ou Educar para o futuro, entre outros. Aos textos descriptivos acompañan imaxes, gráficos, e algunhas viñetas humorísticas, realizadas polo debuxante Santy Gutiérrez.
Entre outros obxectivos, segundo sinalan desde os Museos Científicos Coruñeses, a mostra buscar poñer de manifesto a necesidade fomentar o interese durante a infancia, crear vocacións na adolescencia, formar á mocidade e proporcionar recursos ás persoas que investigan para que poidan desenvolver a súa carreira profesional. Pero tamén é necesario difundir entre a poboación o coñecemento da ciencia e a tecnoloxía, para entender a necesidade de investir na súa promoción si queremos resolver con éxito os retos que afronta a humanidade.
