A babosa de mar atopada en Arousa ten a capacidade de nadar contraendo o seu corpo. Imaxe: GEMM.
A babosa de mar atopada en Arousa ten a capacidade de nadar contraendo o seu corpo. Imaxe: GEMM.

Atopada en Arousa unha lesma de mar “xigante”

Os investigadores do Grupo do Estudo do Medio Mariño de Galicia (GEMM) crían que a lesma de mar que atoparan na ría de Arousa era unha especie xa descrita (Tritonia hombergii) que se pode atopar en augas máis ao norte. Porén, decidiron estudala polo miúdo, e acabaron descubrindo que estaban ante un novo tipo de lesma de mar, non descrita ata agora. E ademais trátase dunha das de maior tamaño do planeta entre os seus conxéneres, con case 20 centímetros, polo que o GEMM cualifícaa como “xigante“.

É a Marionia gemmi (así bautizada na honra do GEMM), que ademais destaca pola súa capacidade de desprazarse nadando grazas ás contraccións que pode facer o seu corpo, un trazo que lle permite moverse pola columna de auga e arrastrarse coa corrente lonxe dos perigos potenciais, tal e como amosa este vídeo:

O traballo no que se describe o achado da babosa publicouse no número 32 da revista Invertebrate Systematics, e está asinado polos membros do GEMM Jacinto Pérez Dieste e Bruno Almón (tamén investigador do Oceanográfico de Vigo), e Manuel Caballer do Muséum National d’Histoire Naturelle de París.

O que aconteceu en Arousa pasou tamén no Golfo de Cádiz, onde se atopou outro individuo identificado en primeiro termo como Tritonia hombergii, pero que despois foi descrito como Marionia gemmi, “o que fai pensar que poida estar presente noutras zonas da Península Ibérica”, segundo o equipo de investigadores galegos.

Esta lesma mariña pertence ao grupo dos nudibranquios, especies de pequeno tamaño e unha cor chamativa, que son moi populares entre os mergulladores. Porén, ata agora non foron quen de describir esta nova especie.

O GEMM é unha asociación sen ánimo de lucro que naceu en 2010, co obxectivo de explorar e divulgar entre o público a riqueza submarina e a importante biodiversidade das augas galegas, unha das máis interesantes da costa atlántica europea, e moitas veces descoñecida para a sociedade do país.

2 COMENTÁRIOS

  1. É babosa se lle caen babas, pero a especie ten o nome común de lesma ou limacha, entre outros.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.