Atopan antigas estruturas de pedra no Barrio do Cura, en Vigo

Un equipo de arqueólogos está a realizar unha escavación nunha zona do Casco Vello, onde se prevé construír unha urbanización

Área do Barrio do Cura afectada pola modificación do Plan Xeral, na que se están a realizar as catas arqueolóxicas. Foto: Concello de Vigo
Área do Barrio do Cura afectada pola modificación do Plan Xeral, na que se están a realizar as catas arqueolóxicas. Foto: Concello de Vigo

O Barrio do Cura, en Vigo, está a piques de experimentar unha fonda transformación. Dende hai anos, proxéctase construír unha gran urbanización con máis de 250 vivendas con vistas ao mar. Varios bloques de edificios que se levantarían nunha serie de parcelas abandonadas. Antes de que isto se convertese en realidade, a Xunta instou á realización dunha serie de catas, posto que se podería restrinxir o uso do solo se se atopasen restos de valor arqueolóxico. Os traballos de escavación comezaron a semana pasada e acaban de dar cos seus primeiros achados: atopan varias estruturas antigas de pedra.

Mais convén ser cautos. Non hai aínda ningún tipo de valoración sobre este descubrimento. O equipo de arqueólogos segue a traballar na zona, á espera de realizar máis catas. Unha vez que conclúan as sondaxes, emitirase un informe. Alí saberase a antigüidade destes restos e o seu verdadeiro valor arqueolóxico. Ata o momento, é preciso esperar. Despois será a Dirección Xeral de Patrimonio a que decida que se debe facer cos achados. E, sobre todo, se dá ou non o visto bo aos primeiros traballos de construción da urbanización.

Peticións veciñais

Este proxecto levábase xestando durante anos e os veciños da zona xa alertaran en máis dunha ocasión da necesidade de levar a cabo controis arqueolóxicos no Barrio do Cura. Dicían que se estaba a mover a terra sen ter en conta as peculiaridades históricas destas parcelas. De feito, insistían na posibilidade de que se atopasen xacementos ou minas antigas, posto que así o recolle o coñecemento popular e os achados noutros puntos do centro histórico de Vigo.

Estas peticións veciñais conseguiron materializarse en xuño. A Dirección Xeral de Ordenación do Territorio e Urbanismo da Xunta emitiu un informe favorable aos cambios previstos no Barrio do Cura, permitindo unha modificación puntual do Plan Xeral de Ordenación Urbana de Vigo. Mais só era un informe favorable, non unha aprobación definitiva. Para conseguir este paso, era preciso realizar as sondaxes que se están levando a cabo agora. A Xunta indicaba que o achado de restos arqueolóxicos podería limitar ou restrinxir os usos do solo, e por iso era preciso facer un estudo previo da zona.

Outros achados

Agora só cabe esperar as conclusións. Algúns alimentan a expectación, posto que o Barrio do Cura aséntase sobre un terreo pouco modificado nos últimos séculos. Así mesmo, nas súas inmediacións xa se atoparon restos arqueolóxicos de gran valor, como os descubertos por Xosé María Álvarez Blázquez a mediados do século pasado. Naquel momento era comisario de arqueoloxía en Vigo e descubriu unha sepultura romana de inhumación a uns trescentos metros de onde están a realizar agora as escavacións. O arqueólogo atopou outros restos de obxectos, que alimentan a expectación que hai arredor do Barrio do Cura. Mais nada confirmado. Polo momento, só cabe esperar.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.