O Centro de Apoio Científico-Tecnolóxico á Investigación (CACTI), da Universidade de Vigo, vén de presentar este modelado 3D da illa de Toralla e as praias de Canido, O Vao e Samil. Os datos para este modelo foron seleccionados, descargados, procesados e editados pola Unidade de Detección Remota do CACTI a partir de sete nubes de puntos individuais (formato LAZ=LAS comprimido) de LIDAR-PNOA cedido polo Instituto Geográfico Nacional de España.
O CACTI é unha aposta da Universidade de Vigo pola investigación básica e aplicada de calidade no ámbito nacional e internacional. Ten como obxectivo a adquisición, xestión e utilización centralizada de grandes equipamentos científicos para cubrir as necesidades dos grupos de investigación da Universidade que non poden adquirilos polo seus propios medios e son indispensables para unha investigación con recoñecemento internacional. Debido á dimensión de servizo público, o CACTI tamén oferta os seus servizos a outras institucións públicas e a empresas. Cubre os servizos máis punteiros da investigación científica: Determinación Estructural e Proteómica, Nanotecnoloxía e Análise de Superficies, Microscopía Electrónica, Desenvolvemente Sostible e Seguridade Alimentaria (en Ourense), Teledetección e Talleres de Mecanizado e Electrónica.
