A fascinante rexeneración da planaria

O xénero das planarias é un interesantísimo campo de traballo para os científicos interesados na rexeneración de tecidos. Cando perden unha parte do seu corpo, acontece algo extraordinario: o individuo volve recuperar a súa situación anterior grazas ás células nai pluripotentes; é dicir, aquelas que se poden diferenciar a partir do seu estado inicial en células dos diferentes tecidos que compoñen un organismo.

A Fundación Española para a Ciencia e a Tecnoloxía (Fecyt), divulgou esta semana nas súas redes sociais un vídeo onde se pode seguir esta rexeneración ao completo. Despois de que unha persoa corte cun coitelo o corpo dunha planaria, acontece algo fascinante. Ao cabo dunha semana, os catro anacos forman cadanseu organismo novo, mesmo recuperando os ollos e o resto de partes do organismo.

Publicidade

Cuando la planaria se corta en trozos, estos tienen la capacidad de regenerarse en un individuo completamente formado. El 25% de su tejido está formado por células madre. #biología #inmortalidad https://t.co/mWgDPYOuvR pic.twitter.com/0DUMguxMKB

— FECYT_Ciencia (@FECYT_Ciencia) October 9, 2019

Tal e como explica Francesc Cebrià, profesor do Departamento de Xenética da Facultade de Bioloxía da Universitat de Barcelona, nun artigo en Investigación y Ciencia, “as planarias son uns animais moi especiais porque manteñen unha poboación de células nai  pluripotente sadultas, coñecidas como neoblastos, durante toda a súa vida”. Así convértense “nun modelo único para estudar a rexeneración baseada en células nai”. Engade Cebrià que “os neoblastos distribúense practicamente por todo o corpo, o que fai que un pequeno fragmento do mesmo poida rexenerar unha planaria enteira en moi poucos días”. E “cando unha planaria é cortada en, por exemplo, dous anacos os neoblastos próximos á ferida aumentan a súa taxa de proliferación dando lugar a un gran número de células que se irán diferenciando en todos os tipos celulares necesarios para rexenerar os tecidos, órganos e estruturas perdidas”.

Deste xeito, engade o científico catalán, “entender como se comportan estas células rexenerativas nestes animais, como proliferan, como se diferencian e organizan para rexenerar os diferentes tecidos, órganos e estruturas pode resultar de gran relevancia para o campo máis aplicado da medicina rexenerativa”.

Publicidade