Entornar os ollos non serve de nada. Hai que esperar a que dúas figuras tan afastadas como curiosas se vaian achegando á beira da praia. A sorpresa é maiúscula: son dous corzos nadando cara a area de Liméns, en Cangas do Morrazo. Tan pronto chegan a terra firme, vense perfectamente as súas figuras, que non tardan en emprender rapidamente o seu camiño cara ao monte.
O vídeo que captura o curioso momento foi gravado o xoves 16 de febreiro dende a praia de Liméns. A xente da zona cre que esta parella de corzos xa é unha vella coñecida, e é a mesma que se deixa ver dende o verán pola zona de Donón-O Hío. Malia que non era habitual velos, dende a pandemia as súas aparicións son cada vez máis frecuentes. De feito, durante o verán pasado tamén se puideron ver dende Barra e Nerga. Outros veciños cren que pode haber máis dunha parella.