Meteogalicia eleva ata o nivel vermello o aviso pola chegada da borrasca Justine, por fenómenos costeiros durante o sábado, mentres que haberá avisos amarelos e laranxas por fortes ventos e choiva xa dende este venres 29 de xaneiro.
Porque esta fin de semana chega ás costas galegas desde os Azores a borrasca Justine que, ademais de deixar abundantes choivas, tamén virá acompañada de fortes ventos no litoral.
Meteogalicia, sinala que estes ventos poden superar o venres pola noite os 80 quilómetros por hora no terzo norte de Galicia e zonas altas. Así, os refachos serán no litoral da Coruña de forza 8, o que se traducirá en “ondas a partir do sábado ao mediodía de ata 8 metros e co cal se vai alcanzar o aviso vermello”.
Deste xeito, o ceo estará cuberto con precipitacións, localmente treboentas. A cota de neve estará situada nos 1.400 metros, aumentando ó final do día. As temperaturas experimentarán un lixeiro descenso. O vento soprará forte de compoñente oeste.
As choivas poden ser intensas na noite do venres ao sábado, sobre todo ao oeste e sur da Coruña e interior da provincia de Pontevedra. Así mesmo, estes territorios terán, a partir do venres, aviso amarelo.
De todos os xeitos, contra todo prognóstico previo, non se pode considerar finalmente a Justine como cicloxéne explosiva. Esta denominación, aínda que tende a xerar alarma, en realidade define unha borrasca que se forma moi rápidamente e que se fai menos predicible, pero non necesariamente ten por que ser máis perigosa que unha borrasca convencional.
A presenza deste ‘tren de borrascas’ é habitual nesta época do ano. Dende o ano 2015, tomouse a decisión de poñer nome a cada unha destas frontes cando levasen parellos avisos por riscos, o cal contribúe a alertar á poboación para poder previr desgrazas. Como consecuencia, tamén teñen moito máis impacto mediático, como acontece agora con Justine ou antes con Filomena.
Aquí podes consultar o boletín de avisos de Meteogalicia