Os modelos de intelixencia artificial están a revolucionar a informática, pero tamén a sociedade. O crecemento exponencial dos últimos anos e, sobre todo, dos últimos meses, trasladou o debate da academia á rúa. Sistemas tan avanzados como Chat GPT ofrecen tanta esperanza como medo. Como se deben usar? Hai algunha normativa que regule o plaxio, por exemplo? Que acontece coa propiedade intelectual? Estas e moitas outras preguntas resolvémolas no segundo episodio de O Descodificador, un pódcast de GCiencia en colaboración co CITIC. Neste capítulo, titulado A ética, a tarefa pendente da intelixencia artificial, falamos cos expertos Verónica Bolón e Carlos Gómez.
Os dous investigadores do CITIC avogan por unha regulación que protexa os dereitos das persoas pero que non free os avances en intelixencia artificial. Son conscientes de que atopar o equilibrio non é tan sinxelo como dicilo en voz alta. Piden, por tanto, que os algoritmos sexan máis robustos e que os sistemas sexan éticos e transparentes. De igual modo que os fármacos deben pasar por un exhaustivo control de calidade, tamén o deberían facer os modelos de intelixencia artificial, segundo reflexiona Bolón. Estas e outras ideas, no novo episodio de O Descodificador.
Episodio realizado por Laura Filloy
Edición: Carlos Tresandí
Escoita O Descodificador nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
