Únete á nosa canle de Whatsapp
Dúas novas partículas observadas e unha terceira que ten todos os números para confirmarse. É un novo e importante achado realizado no Gran Colidor de Hadróns (LHC, en inglés) ubicado en Xenebra (Suíza) e considerado o maior experimento do mundo. E científicos de Galicia están presentes neste importante avance no eido da Física. Porque investigadores do Instituto Galego de Física de Altas Enerxías, adscrito á Universidade de Santiago, forman parte do equipo que detectou dous novos barións e un posible tetraquark que supoñen un gran avance no mundo da física de partículas. A que revela a natureza da que está feita o Universo.
Os resultados recén publicados amosan a observación de dúas novas partículas que nunca se viron antes, ademais de apuntar a evidencia dunha terceira. As dúas novas partículas, preditas polo modelo de quark estándar, son barións, a mesma familia que os protóns utilizados nos experimentos de aceleración de partículas LHC.
Os barións son a esencia do que se compón a maior parte do Universo , incluídos os protóns e os neutróns. Os protóns constan de dous quarks up e un quark down, mentres que os neutróns constan dun quark up e dous quarks down. Pero as dúas novas partículas descubertas teñen unha composición lixeiramente diferente. Estas partículas coñécense como barións inferiores e están relacionadas con catro partículas observadas previamente en Fermilab.
Sobre a terceira partícula, os investigadores pensan que podería ser un tipo estraño chamado tetraquark . Falamos dun tipo exótico de mesón, que normalmente ten dous quarks. Pero un tetraquark está composto de catro quarks, ou máis ben dous quarks e dous antiquarks, para ser máis precisos.
A evidencia observacional de tetraquarks foi bastante difícil de alcanzar ata a data. Por iso é tan importante esta observación, que se reflicte nos dous artigos publicados polo CERN de Xenebra e con participación galega. Entre os investigadores, atópase Bernardo Adeva, da Universidade de Santiago.
A clave pola que o achado non se pode dar por seguro está nas ‘desviacións estándar‘. Faltan evidencias para que os físicos teñan a certeza de que atoparon este tetraquark.
Aquí podes ler as reportaxes realizadas por GCiencia no noso ESPECIAL GALEGOS NO CERN
E aquí podes ler os dous artigos que sustancian estes descubrimentos:
