Explicación: esta encantora nebulosa simétrica, á deriva nos ricos eidos estelares da constelación Cygnus, só se recoñeceu hai uns poucos anos e aínda non aparece nalgúns catálogos astronómicos. De feito, o astrónomo afeccionado Dave Jurasevich identificouna coma unha nebulosa o 6 de xullo de 2008 nas súas fotografías da complexa rexión de Cygnus que incluía á nebulosa da Media Lúa (NGC 6888). Posteriormente notificouno á International Astronomical Union (Unión Astronómica Internacional). Só once días despois o mesmo obxecto foi identificado independentemente por Mel Helm nos Observatorios Sierra Remote, fotografado por Keith Quattrocchi e Helm e tamén remitido á IAU coma unha posible nebulosa descoñecida. A nebulosa, que aparece á esquerda da imaxe presentada, é coñecida agora coma a nebulosa Pompa de Xabón. Que é a nebulosa recén descuberta? O máis probable é que sexa unha nebulosa planetaria, unha fase final na vida unha estrela de tipo solar.
A nebulosa Pompa de Xabón
