Reunión do Consello de Goberno da UVigo. Foto: Duvi.

Reunión do Consello de Goberno da UVigo. Foto: Duvi.

A UVigo implantará o vindeiro ano un grao de Enxeñaría Biomédica

A proposta da nova titulación foi aprobada xunto a sete novas ensinanzas de máster

O Consello de Goberno da Universidade de Vigo aprobou este luns a implantación dun novo grao e sete másters de cara ao curso 2018-2019. A principal novidade é a aceptación da proposta da Escola de Enxeñaría Industrial para comezar a impartir o grao en Enxeñaría Biomédica.

A vicerreitora de Organización Académica e Profesorado, Ana Graña, definiu como “unha proposta interesante” a nova titulación, que terá por obxectivo formar profesionais da enxeñaría biomédica e aplicar os principios e coñecementos da enxeñaría industrial, da de telecomunicación e informática ao campo médico e de tecnoloxía de produtos sanitarios. Impartirase na Escola de Enxeñaría Industrial, mais coa colaboración de Telecomunicación e as facultades de Bioloxía e Química.

Haberá novos mestrados en Bioloxía, Aeronáutica, Educación, Comunicación e Economía

No caso dos mestrados, as declaracións de interese corresponden a dúas propostas da Facultade de Bioloxía para impartir senllos másters interuniversitarios en Biodiversidade Terrestre e Xestión do Medio Natural e en Metodoloxías Xenómicas e Xenéticas, ás que se engaden as declaracións de interese, tamén aprobadas, da Escola de Enxeñaría Aeronáutica e do Espazo que presentou o Máster en Enxeñaría de Sistemas Aéreos non Tripulados; a da Facultade de Ciencias da Educación e do Deporte, que solicitaba o Máster Interuniversitario en Especialización, Investigación e Innovación en Educación Infantil e Primaria; a da Facultade de Ciencias Sociais e da Comunicación sobre a implantación do Máster en Social Media Management e Creación de Contidos Dixitais e a da Facultade de Ciencias Económicas e Empresariais sobre un Máster en Economía.

Todo apunta a que no curso 2019-2020 tamén entren en funcionamento novas titulacións, como o Grao de Deseño e Creación na Facultade de Belas Artes e dous novos mestrados na Escola de Enxeñería Aeronáutica e do Espazo: o Máster en Ciencia e Tecnoloxía do Espazo e outro en Enxeñaría Aeronáutica.

Outro dos acordos adoptados hoxe polo Consello de Goberno permitirá a entrada en vigor para o vindeiro curso 2017-2018 do programa conxunto de estudos oficiais do Grao en Turismo e o Grao en Xeografía e Historia no campus de Ourense. Así mesmo, o vindeiro curso tamén comezará a impartirse no campus de Pontevedra o Máster Universitario en Deseño e Dirección Creativa en Moda, que substituirá curso ao titulo propio Estudos Superiores de Deseño Téxtil e Moda, cuxo calendario de extinción tamén foi aprobado na sesión deste luns.
 

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.