Lixo espacial sobre a túa cabeza? Esta aplicación permite detectalo en tempo real

Un mapa interactivo permite observar satélites e residuos que orbitan arredor da Terra e a súa traxectoria

Captura coa traxectoria do Ariane.

Unha ferramenta deseñada pola empresa estadounidense Esri e baseada en tecnoloxía ArcGIS, software que combina mapas e análises de datos xeoespaciais para ofrecer intelixencia de ubicación, mostra a través dunha simulación satelital o lixo espacial que está a vagar arredor do noso planeta en tempo real.

Pois o certo é que contamos con cantidades enormes de residuos que vagan moi preto da Terra e que debido ao cambio climático e aos seus efectos nocivos sobre as capas máis altas da atmosfera, estas acumulacións son cada vez maiores e máis habituais no espazo. Segundo indican datos achegados pola NASA, no ano 2021 arredor do noso planeta había máis de 20.000 fragmentos de residuos dun tamaño maior ao dunha pelota de béisbol.

Elementos sobrevoando o ceo de Galicia e de parte da península.

Como explicou recentemente en GCiencia o físico Juan Antonio Añel, este lixo adoita destruírse ao entrar nas capas superiores da atmosfera, incinerándose, dada a súa velocidade, antes de chegar a terra. Mais, nos últimos anos, estas capas altas da atmosfera están a contraerse, principalmente, polas emisións de gases de efecto invernadoiro, polo que o lixo tarda en destruírse. Ante esta problemática, xurde esta simulación web de libre acceso, desenvolvida polo Laboratorio de Prototipos de Aplicacións de Esri en Redlands, California, que pretende levar aos seus usuarios por unha viaxe de narración visual inmersiva, como é neste caso a simulación do lixo no espazo, así como os propios satélites.

Navegar entre satélites

A aplicación de Esri permite ao usuario entrar nunha simulación da Terra e dos satélites e lixo espacial que a rodea en tempo real. Ten cargados en total ata 19.097 satélites, representados por pequenos puntos brancos que se sitúan sobre a escuridade do espazo e que se van desprazando imitando a traxectoria real.

Esta ferramenta foi construída usando tecnoloxías como API de ArcGIS, Bootstrap de Twitter Inc. ou fontes de Google como Orbitron e Oswald. Unha vez dentro da simulación, o usuario pode ampliar e diminuír o mapa para navegar polo espazo e coñecer así os distintos satélites e os residuos que aínda seguen orbitando arredor da Terra.

Ao premer sobre un dos puntos, aparece á esquerda do mapa toda a información sobre o satélite, como o seu nome, o país de procedencia, a inclinación ou a data do seu lanzamento; así como a súa órbita. Por exemplo, á altura da costa galega, atravesou o espazo o Fengyun 1C DEB, procedente dun lanzamento espacial realizado o 5 de outubro de 1999, dende a China, e que aínda segue orbitando arredor do noso planeta.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.