Chega o colchón que detecta se a túa parella ten unha infidelidade. Durmet, unha fábrica radicada en Arteixo (A Coruña), tense convertido nun fenómeno en redes sociais tras anunciar un invento chamado a revolucionar o mundo do descanso e as relacións de parella. “Para poder descansar de noite e tamén de día” é o lema baixo o que din ter desenvolvido unha nova tecnoloxía que nos avisa a través dunha app para o móbil cando o colchón está a ser utilizado dunha forma “estraña”, é dicir, cando a nosa parella se atopa durmindo na nosa cama cunha persoa distinta.
A firma galega Durmet, propiedade do industrial Antonio Muiño, anunciou que presentará o seu colchón intelixente e ‘anti-cornos‘ (denominado Smarttress), o mércores 13 de abril en Madrid, aproveitando para o seu lanzamento a conmemoración do Día Internacional do Bico.
A empresa non desvela a tecnoloxía empregada no colchón ‘anti-cornos’
Como campaña de márketing, o colchón galego intelixente anti infidelidades está a ser un éxito. Pero nada din sobre a tecnoloxía desenvolvida para detectar que a nosa parella está a deitarse con outra persoa na nosa propia cama. Polo de agora todo é un misterio.
Nunha nota de prensa, Durmet dá máis interese a nova salientando que os españois son os europeos máis infieis. E que cometen unha media de 2,3 aventuras ao ano, “polo que probablemente haxa moitas persoas no noso país que desexen saber se a súa parella está a durmir con alguén máis na súa cama”.
A fábrica de Arteixo mantén tamén a expectación nas súas contas de Facebook e Twitter. E achegan algúns datos, como que a aparencia do colchón é absolutamente normal e que resulta moi confortable.