Ningún ser vivo se move máis rápido que a Mystrium camillae, unha especie de formiga, coñecida tamén como formiga Drácula, que é tan pequena como a xema dun dedo. Acada os 320 quilómetros por hora nun movemento que fai coas súas mandíbulas. Así o acaban de captar, por vez primeira, científicos do instituto Smithsonian, nun avance publicado en Royal Society Open Science. Este movemento é cinco mil veces máis rápido ca un pestanexo dos ollos, e mil veces máis rápido ca o xesto de chascar os dedos das mans.
A formiga Drácula é unha peculiar especie que adoita zugar o sangue das súas propias larvas, nunha práctica coñecida como canibalismo non destrutivo. Mediante unha cámara de gran velocidade, os científicos viron como, ao presionar as puntas das súas mandíbulas, a presión comeza a acumularse entre elas ata que acada un punto de ruptura, liberando unha das partes para que se deslice sobre a outra. A acción tarda apenas 0.000015 segundos, e acada os 320 km/h nese tempo.
Hai, polo menos, outras seis especies cun movemento semellante, pero a especial morfoloxía da formiga Drácula faina especialmente rápida. Así, só chegan a acadar velocidades entre 10 e 20 veces menores. No seu caso, o proceso comeza desde unha posición pechada e logo vai deslizándose. Ademais, os mecanismos de resorte e peche están incrustados dentro da mandíbula.
Os investigadores aínda non puideron describir a orixe exacta deste peculiar movemento. Porén, si se viu que a enerxía na formiga Drácula almacénase nos músculos e logo libérase a través dalgún tipo de resorte elástico, podendo así buscar comida e defenderse dos depredadores de forma eficiente. Con todo, unha das posibilidades é o peculiar hábitat subterráneo da formiga, en túneles subterráneos e troncos estreitos onde é máis difícil moverse coas mandíbulas abertas, polo que acabaron adaptándose e partindo dunha posición pechada.
Referencias: Snap-jaw morphology is specialized for high-speed power amplification in the Dracula ant, Mystrium camillae, publicado en Royal Society Open Science.