A Fundación Barrié convoca a 33.ª edición do Programa de Bolsas de Posgrao para a ampliación de estudos no estranxeiro co obxectivo de facilitar o acceso ao coñecemento das mellores técnicas, métodos e procedementos a nivel internacional.
Esta nova convocatoria, cuxo prazo remata o 14 de febreiro, introduce por primeira vez a posibilidade de realizar programas de doutoramento e postdoutoramento na LSU Health Shreveport, Estados Unidos. Esta novidade busca fomentar os vínculos profesionais, académicos e sociais de persoas tituladas vinculadas a Galicia co continente americano.
A fundación galega puxo en marcha este programa no ano 1990, cunha inversión acumulada de máis de 44 millóns de euros, da cal se beneficiaron ata o momento 710 galegos/as.
Estudos de Mestrado
A convocatoria ten por obxectivo a concesión dun total de 10 bolsas para a realización de estudos de Mestrado en todas as áreas de coñecemento durante o curso académico 2022-2023 en institucións extranxeiras de referencia internacional. Estas bolsas están dirixidas a titulados/as universitarios/as con nacionalidade española e vinculados/as a Galicia. A dotación económica da bolsa será dun máximo de 50.000 euros anuais. Podes acceder ás bases completas e ao formulario de solicitude na seguinte ligazón.
Programa de Doutoramento en Estados Unidos
A convocatoria ten prevista a concesión de catro bolsas para a realización dalgún dos seguintes programas de doutoramento ofrecidos pola LSU Health Shreveport: Bioquímica e Bioloxía Molecular; Microbioloxía e Inmunoloxía; Fisioloxía Celular e Molecular; Anatomía e Bioloxía Celular; e Farmacoloxía; Toxicoloxía e Neurociencia.
Estas bolsas están dirixidas a titulados/as universitarios/as galegos/as na área de Ciencias da Vida. Para participar no programa non será necesario dispor dun título de Mestrado. Poden optar a estas bolsas tamén o estudantado do último curso de grao. A dotación económica da bolsa inclúe un salario anual base de 26.000 dólares, así como unha asignación anual de 6.000 euros para gastos de manutención e seguro médico.
A duración da bolsa será, como máximo, de cinco anos. As persoas seleccionadas poderán comezar o programa de doutoramento en agosto de 2022. Podes acceder as bases completas e formularios de solicitude na seguinte ligazón.
Programa de Postdoutoramento en Estados Unidos
A convocatoria, dirixida a persoal investigador na área de Ciencias da Vida, ten prevista a concesión de dúas bolsas para desenvolver investigación avanzada no LSU Health Shreveport. Entre as principais áreas de investigación inclúense: Microbioloxía e Inmunoloxía; Cardioloxía; Cáncer; e Farmacoloxía.
A dotación económica da bolsa inclúe un salario anual base de 52.000 dólares, así como unha asignación anual de 12.000 euros para gastos de manutención e seguro médico. A duración da bolsa será, como máximo, de catro anos.
As persoas seleccionadas poderán comenzar o programa de postdoutoramento na LSU Health Shreveport entre abril e setembro de 2022. Podes acceder as bases completas e formularios de solicitude na seguinte ligazón.