As Xornadas Nacionais de Investigación en Ciberseguridade (JNIC) deixan para a Universidade de Vigo moi bos resultados. E é que nesta cita, que é unha referencia nacional no eido da ciberseguridade, organizada pola Universidad de Castilla-La Mancha en colaboración co Incibe (Instituto Nacional de Ciberseguridad), os investigadores de atlanTTic acadaron dous premios por dous artigos presentados.
Por unha banda, o xurado outorgou o galardón ao Mellor traballo xa publicado ao artigo A review of Camera Attribution Forensic Analyzer in the Encrypted Domain, asinado polos investigadores do Grupo de Procesado de Sinal en Comunicacións Alberto Pedrouzo-Ulloa, Miguel Masciopinto e Fernando Pérez-González en colaboración con Juan R. Troncoso Pastoriza, da Escola Politécnica Federal de Laussane (Suíza). A súa proposta foi seleccionada como a mellor entre 30 traballos presentados nesta categoría. No artigo, os enxeñeiros describen un sistema para resolver o problema de atribución de cámara, pero preservando a privacidade da información en todo momento. Este procesado seguro conséguese grazas a que os sinais involucrados están cifrados durante todo o proceso de computación. Polo tanto, a solución proposta permite coñecer dende que cámara determinada se sacou unha imaxe e, á súa vez, evita comprometer a privacidade da información involucrada. Os investigadores de atlanTTic explican que “aínda que o problema de atribución de cámara é xa coñecido, era a primeira vez que se resolvía traballando con sinais cifrados”.
O segundo galardón do congreso que vén para a UVigo é o premio ao Mellor artigo curto, polo traballo Homomorphic SVM Inference for Fraud Detection, asinado por Adrián Vázquez-Saavedra, Gonzalo Jiménez-Balsa e Jaime Loureiro-Acuña de Gradiant, e Manuel Fernández-Veiga e Alberto Pedrouzo-Ulloa de atlanTTic. Este artigo está baseado no traballo fin de mestrado de Adrián Vázquez-Saavedra, titorizado polo profesor Manuel Fernández-Veiga e defendido no marco do Máster Interuniversitario en Ciberseguridade MUniCS. O traballo presenta un prototipo que permite externalizar de forma segura un servizo de detección de fraude empregando esquemas de criptografía homomórfica, que permiten traballar directamente coa información en cifrado.
A sexta edición das JNIC contou con mesas redondas e conferencias, ademais das sesións nas que se presentaron un total de 86 artigos de investigación relacionados con diferentes ámbitos da ciberseguridade como detección de Intrusos e xestión de anomalías; IA e ciberseguridade; detección de intrusos e xestión Anomalías; Goberno e xestión de riscos; ciberataques e intelixencia de ameazas; tecnoloxías emerxentes e adestramento. Os investigadores de atlanTTic presentaron as súas achegas nas sesións de investigación dedicadas a criptografía e a análise forense e cibercrime.
O equipo do Grupo de Procesado do Sinal e Comunicacións céntrase na participación en proxectos colaborativos e iniciativas de investigación sobre seguridade da información e privacidade na nube, que lle permiten poñer en valor a súa experiencia a través de novos desenvolvementos e a exhibición e proba de tecnoloxías de procesamento de sinais encriptados en escenarios e usos relevantes. Durante os últimos veinte anos, obtiveron máis de 15 millóns de euros en investigación e os seus membros teñen publicado máis de 150 artigos en revistas científicas e 300 papers, incluíndo a participación en diversos proxectos europeos relacionados coa seguridade da información. No campo da transferencia tecnolóxica o grupo ten unha gran actividade con máis de dez patentes, entre elas seis europeas e americanas, e varios contratos con empresas para tarefas de I+D e varias licencias a compañías internacionais.
Podes ler a noticia do DUVI nesta ligazón.