O verán e altas temperaturas, a exposición á radiación ultravioleta, o aire acondicionado ou os baños en piscinas e praias, requiren un coidado específico dos nosos ollos. O Colexio de Ópticos Optometristas de Galicia sinala que estes factores poden contribuír ao desenvolvemento de problemas visuais a curto, medio ou longo prazo, como son as infeccións, a conxuntivite, o ollo seco, a irritación, a queimadura da córnea, as cataratas ou a dexeneración macular.
Como unha alternativa máis cómoda ás lentes para gozar do verán e practicar deportes ao aire libre, o Colexio Oficial de Ópticos Optometristas de Galicia recomenda o uso das lentes de contacto, un produto sanitario que xa utilizan máis de 2,5 millóns de persoas en España.
Establecementos profesionais e seguros
Aínda que a lente de contacto é un produto sanitario que debe estar dispensado por un óptico optometrista, aínda hai moitas persoas que deciden comprar as súas lentes de contacto en páxinas web dedicadas á súa venda sen ningún control profesional nin sanitario, algo que pon en risco a súa saúde visual e pode causar a aparición de alteracións visuais e mesmo danos oculares.
Entre as alteracións detectadas nos establecementos de óptica destacan as conxuntivites, inflamacións da córnea, reaccións alérxicas, abrasións na córnea por un mal axuste das lentes de contacto e a redución da agudeza visual, que pode interferir en actividades diarias como ler ou conducir. Ademais, nos casos máis graves detectáronse queratites microbianas, unha infección pouco frecuente pero grave, e úlceras na córnea que poden requirir de tratamento oftalmolóxico e nos peores casos dexenerar nunha discapacidade visual.
Os usuarios deben esixir que un profesional óptico optometrista adapte as súas lentes de contacto aos ollos de forma correcta, cun exame completo e unha proba previa de porte, ademais de recibir as indicacións de uso e manipulación a través do adestramento dun óptico optometrista.
Para a época estival, os optometristas galegos aconsellan as lentes de contacto desbotables diarias, debido a que se evita o traballo continuo de limpeza que pode resultar complicado cando se viaxa. Aínda que estas lentes teñan filtro ultravioleta, os profesionais galegos lembran que non substitúen ás lentes de sol, pois só protexen da radiación solar a córnea e parte da conxuntiva, pero o resto do ollo e as pálpebras continúan expostos.
Coidado especial
Os optometristas explican que é fundamental que as lentes de contacto se entreguen en envases sen manipular e sen abrir, diferenciando as lentes dos ollos dereito e esquerdo. Para protexer os ollos débense seguir responsablemente as instrucións de uso e conservación das lentes de contacto, ademais de realizar un mantemento correcto e manter a súa hixiene, co obxecto de evitar molestias e problemas corneales, como erosións, úlceras ou infeccións.
“Máis do 90% dos problemas provocados polas lentes de contacto derívanse directamente dun mal uso ou coidados inadecuados por parte do usuario, xa sexa exceder no tempo de porte ou unha mala hixiene”, explica a presidenta do Colexio, Esther Amaro Quireza. Para maior protección, a entidade colexial aconsella lavar as mans con auga e xabón antes de poñerse e quitarse cada unha das lentes de contacto, polo menos durante 20 segundos.
Ademais, os expertos recomendan para bañarse en piscinas ou praias o uso de lentes de baño ou mergullo para evitar o contacto con axentes irritantes (cloro) e contaminantes (virus e bacterias), por suposto obrigatorias para as persoas que se bañen coas lentes de contacto postas, para os que outra opción sería bañarse sen elas.
Con estas medidas preventivas, os ópticos optometristas galegos aseguran que se evitarán gran parte dos problemas que adoitan afectar os ollos durante o verán. Pero se persisten as molestias, como irritación, secura, exceso de bágoas ou dor, deberase consultar cun óptico optometrista.
