A científica viguesa África González é unha das doce finalistas do premio europeo Women Innovators, que se entrega mañá en Bruxelas coincidindo co Día Internacional da Muller. González é candidata como fundadora da empresa Nanoimmunotech, empresa punteira no eido da nanotecnoloxía. Amais desta labor empresarial, tamén dirixe o Centro de Investigacións Biomédicas (Cinbio), que compaxina coa súa labor como catedrática de Inmunoloxía na Universidade de Vigo.
Xunto a González están nominadas outras tres científicas españolas (Gema Climent, Gemma Galdón e Isabel Trillas), ademais de candidatas de Francia, Alemaña, Reino Unido, Suecia, Italia e Bulgaria. O galardón premiará a catro mulleres, unha delas nunha nova categoría dedicada ás mozas innovadoras de menos de 30 anos e que percibirá 20.000 euros, mentres que as outras tres galardoadas recibirán 100.000, 50.000 e 30.000 euros, respectivamente.
