O río atmosférico que vemos na imaxe trae fortes choivas a Galicia durante a tarde e noite deste xoves. A auga que cae con estas precipitacións chega directamente dende latitudes tropicais na outra banda do océano Atlántico.
Un río atmosférico, segundo explican desde MeteoGalicia, é unha “masa de aire moi húmido, con grandes cantidades de auga precipitable nas capas altas da atmosfera, que pode chegar a ter milleiros de quilómetros de longo e poucos centos de quilómetros de ancho, que cruza o Atlántico desde as latitudes tropicais ata a costa europea”.
Este fenómeno, estudado en profundidade desde hai anos por expertos galegos de MeteoGalicia e a USC, ten unha grande importancia para a climatoloxía debido á gran achega de humidade que traen consigo. Así, os traballos realizados neste senso tiveron un importante impacto internacional.
O paso deste río atmosférico deixa aviso amarelo por fortes precipitacións en toda a provincia de Pontevedra e no Oeste da Coruña, ademais de ondas de 4 a 5 metros en todo o litoral galego.
Tras superar este fenómeno de fortes choivas, chega o tempo cálido, con altas temperaturas previstas para Galicia durante a fin de semana.
E aquí podes ler máis sobre os ríos atmosféricos e Galicia:
Físicos de Santiago estudan os 'ríos atmosféricos' que traen choiva a Galicia
