A investigadora da Estación de Hidrobioloxía Encoro do Con da USC María del Carmen Cobo acaba de obter dúas bolsas de concorrencia competitiva para a realización de estadías internacionais de investigación. A doutora Cobo obtivo a bolsa do programa Fullbright ‘Ruth Lee Kennedy’, promovida polo Instituto Internacional e a Comisión de Intercambio Cultural, Educativo e Científico entre España e os Estados Unidos de América, e a ‘Early career Research Grant’ da Sociedade Malacolóxica de Londres.
A primeira das axudas destínase a doutores/as que queren investigar en centros de ensinanza superior nos Estados Unidos de América, mentres que a segunda outórgase a investigadores internacionais sen cargos profesionais para apoiar a publicación da investigación sobre moluscos.
Mª del Carmen Cobo realizará a súa estadía no departamento de Ciencias Biolóxicas da Universidade de Alabama-Tuscaloosa e no Museo de Historia Natural de Alabama. Nel estúdase a sistemática e xenómica evolutiva dos invertebrados mariños utilizando secuenciación de alto rendemento e ferramentas bioinformáticas baixo a dirección do doutor Kevin Kocot. A doutora Cobo participará nun proxecto que inclúe o estudo filoxenético dos moluscos aplacóforos, baseado en datos moleculares e abordará o estudo taxonómico e afondará nas técnicas de obtención do DNA barcoding contribuíndo a crear unha ampla biblioteca con secuencias moleculares de Solenogastros e Caudofoveados.
No 2017, Cobo presentou a súa tese de doutoramento, na que describiu por primeira vez para a ciencia 12 especies de moluscos abisais en augas do Pacífico Sur.
