Xoves 28 Marzo 2024

A pequena ciencia dos grandes proxectos

 Español bandera-uk English

Empecemos polo principio. Detrás do complicado nome de nanobiotecnoloxía escóndese unha non menos complexa rama da nanotecnoloxía con aplicacións ou usos biolóxicos ou bioquímicos. É o campo no que se move Nanoimmunotech, unha spin-off xurdida das universidades de Vigo e Zaragoza, con desenvolvementos tan útiles como diversos: da localización de tumores á detección exprés de salmonella, ou da elaboración de test de embarazo á depuración de augas con ozono e nanopartículas de ouro.
“A empresa xurdiu en 2009 como consecuencia do enorme coñecemento que se atesoura no campo da nanobiotecnoloxía e das importantes perspectivas comerciais que ofrece”, explica o seu máximo responsable, Rubén Santos. O Centro de Investigacións Biomédicas de Vigo (Cinbio) e o Instituto de Nanociencia de Aragón (INA) unían as súas forzas para o desenvolvemento dunhas posibilidades que se enxergaban extensas. A participación en programas de colaboración, como os tres consorcios empresariais Interconnecta nos que participou, completan “un claro exemplo do éxito da tripla hélice: institucións, empresas e universidades”.

Bioconxugación, nanosensores e nanotoxicidade son as súas grandes áreas

Nanoimnmunotech, con sedes en Vigo e Zaragoza, participou en proxectos conxuntos para o desenvolvemento dunha vacina contra a cistite, a detección de substancias en plantas potabilizadoras ou a determinación do nivel de estrés en animais previo ao seu sacrificio, a través de análises de suor ou saliva, con compañías como CZ Veterinaria, Copasa ou Coren. Deste xeito, puido desenvolver un I+D no que traballan de forma permanente un mínimo de 14 empregados. “Somos unha empresa basicamente de I+D; é a principal finalidade do noso gasto, ao que destinamos máis do 50% do presuposto,” resume Santos.
A través das súas cinco marcas, a spin-off universitaria ofrece unha ampla gama de produtos e servizos feitos á medida: por exemplo, o deseño de nanopartículas, nanomateriais ou nanosistemas complexos; a comprobación das propiedades dun produto, os seus efectos biolóxicos ou o deseño de revolucionarios biosensores para a detección rápida, sinxela e ultrasensible de multianalitos.

nano1
Rubén Santos.

bioconxugación é un dos tres grandes campos nos que se desenvolve a compañía. “Trátase de pegar, unir biomoléculas con outras biomoléculas, nanopartículas, superficies, principios activos, fármacos… é algo que dá máis valor engadido á nanobiotecnoloxía, ademais do éxito que tiveron estes novos materiais biotecnolóxicos. A bioconxugación é moi interesante porque se logra un conxunto ou conxugado que ten como funcións a suma de todas as partes que se engadiron”, relata Santos. “Prestamos servizos a empresas do talle de Philips para mellorar os seus produtos de diagnóstico, e o que achegamos son os servizos de bioconxugación”.
A partir de aí, Nanoimmunotech buscou unha mellor formulación para facilitar unha ferramenta aos investigadores, tanto do ámbito público coma privado. Así comezou a desenvolverse un I+D que derivou en Nitzipper, unha tecnoloxía patentada que provén das universidades de Vigo e Zaragoza e que se destina a investigacións tan variadas como diagnóstico humano e animal ou ao sector alimentario. “Agora está a primeira xeración de produtos no mercado e xa xera vendas incipientes en máis de 20 países e contratos de distribución en Alemaña, Xapón, Corea do Sur…

Publicidade

A compañía xorde das universidades de Vigo e Zaragoza, onde ten as súas sedes

Outra das liñas de traballo da empresa prodúcese no terreo dos nanobionsensores: algo que detecta un elemento vivo, sexa na auga, no aire ou no sangue, por exemplo. “Ao final ese biosensor necesita un elemento biolóxico de recoñecemento; detectar unha biomolécula á que se une e di: pois aquí hai un patóxeno como a salmonella, ou un pesticida, ou un marcador canceríxeno,”. Iso transfórmase nun sinal visible, unha tradución perceptible, como no caso das tiras de embarazo.
“Biosensores hai moitos, con tecnoloxías diferentes. No noso campo, o que ofrecemos é a tecnoloxía de bioconxugación, e vimos que había un nicho porque había tecnoloxías moi sensibles pero moi custosas, para diagnóstico hospitalario, por exemplo, e outras moi sinxelas pero de escasa sensibilidade”. Así foi como se abriu o terreo para desenvolver un sistema moi sensible, pero á vez sinxelo e económico. Xerouse unha tecnoloxía, en colaboración co CSIC e a Fundación Araid, que mide un cambio de temperatura. “Xérase calor que un pode detectar; está a funcionar moi ben no laboratorio con marcadores como o do cancro de colon, por exemplo,”. Pero é no sector alimentario e na detección de patóxenos, de interese para a industria por exemplo conserveira, no que se centra o seu desenvolvemento comercial.

Nanoimmunotech (35)
Nanoimmunotech ten sedes en Vigo e Zaragoza.

A terceira pata da investigación de Nanoimmunotech é a nanotoxicidade. Existen máis de 2.000 produtos que empregan nanopartículas, moitos deles de uso diario: dende fármacos a cremas cosméticas ou protectores solares, pasando por alimentos. Recentemente descubriuse que os ensaios deste tipo de produtos son incorrectos. Iso levou o Cinbio de la Universidade de Vigo, xunto con outras institucións, a desenvolver protocolos para facer deteccións fiables en produtos con nanoparticulas; é dicir, no campo da nanotoxicidade. “Todo ese coñecemento licenciouse para que houbese un beneficio mutuo e traballar nesa liña, e poder ofrecer así estes ensaios correctos”, explica o CEO da empresa.
Con todo ese abano de servizos, Nanoimmunotech consolidouse como unha demostración da importancia de trasladar ao mundo da empresa o coñecemento das universidades. O, dito doutro xeito, da proba de que o coñecemento tamén é economía.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Inmaculada Rodríguez: “Antes faciamos empresas de parafusos, agora de ciencia e tecnoloxía”

A directora xeral de Unirisco reclama dar o salto da investigación á empresa nas xornadas 'Investir en Ciencia si é rendible’, que organiza xunto a Noso Capital

Galicia lidera o debate sobre a rendibilidade da ciencia da man de Unirisco

Universidades europeas e centros de investigación analizarán en Santiago o impacto das tecnoloxías disruptivas e a importancia de crear ecosistemas emprendedores

A credibilidade na ciencia é menor entre a mocidade que entre o público adulto

Só o 72,6% das persoas de entre 18 e 24 anos cre que as disciplinas científicas buscan a verdade, fronte ao 90,2% da poboación maior de 65 anos

Seis imaxes que cambiaron a historia da ciencia

https://theconversation.com/javascripts/lib/content_tracker_hook.js *Un artigo de O ser humano empregou primeiro o debuxo e...