Como se mide a contaminación lumínica? É a primera pregunta á que quere contestar O Descodificador, no nóvo podcast de GCiencia, que se estrea este venres co obxectivo de entender mellor as tecnoloxías da información. O espazo conta coa colaboración do Centro de Investigación en Tecnoloxías da Información e as Comunicacións (CITIC) e forma parte do proxecto colaborativo Coñece o CITIC.
Nesta primeira entrega do Descodificador, contaremos coa presencia de José Carlos Dafonte, director dun proxecto do CITIC que desenvolve un fotómetro para medir a contaminación lumínica, e de Daniel Boubeta, responsable da parte do proxecto que se centra nos dispositivos de medición. O seu fotómetro é máis barato que os que hai actualmente no mercado e tamén é de código aberto. Máis alá do seu uso por parte de institucións e afeccionados, os investigadores buscan concienciar a poboación sobre os riscos deste tipo de contaminación.
Nesta primeira temporada, o pódcast constará de oito episodios nos que os investigadores do CITIC abordarán os novos retos das tecnoloxías da información e a da comunicación, e achegarannos as principais investigacións e proxectos que se desenvolven no centro de investigación impulsado pola Universidade da Coruña. O podcast intégrase no proxecto global de GCiencia Coñece o CITIC, iniciado o pasado mes de abril, no que se abordan as actividades dos grupos de investigación que forman parte de centro e proxectos concretos dos mesmos.
O centro
O CITIC é un centro de investigación que potencia o avance e a excelencia en I+D+i aplicada ás TIC, creado en 2008 pola Universidade da Coruña. A actividade científica do centro estrutúrase en catro áreas de investigación principais: Intelixencia Artificial; Ciencia e Enxeñaría de Datos; Computación de Altas Prestacións; e Servizos e Redes Intelixentes, e unha área de investigación transversal a todas elas: a de Ciberseguridade.
Na actualidade, o CITIC está financiado pola Xunta de Galicia a través do convenio de colaboración entre a Consellería de Cultura, Educación, Formación Profesional e Universidades e as universidades galegas para o reforzo dos centros de investigación do Sistema Universitario Galego (CIGUS).
Un dos obxectivos do CITIC pasa por poñer ao alcance da sociedade os resultados das súas investigacións, polo que o centro promove accións de ciencia cidadá e actividades divulgativas que potencien as vocacións científicas e garantan a renovación do talento no ámbito das TIC.
