Con motivo do Día Mundial dos Océanos, celebrado cada 8 de xuño, charlamos con Beatriz Legerén, integrante de Misión Azul, un proxecto do Centro de Investigación Mariña (CIM) da Universidade de Vigo (UVigo) en colaboración con AtlanTTic e a Facultade de Ciencias Sociais e da Comunicación do campus de Pontevedra. A través de Misión Azul, o equipo ofrece formación sobre as ciencias mariñas tanto para o alumnado como para o profesorado.
Nestes momentos tamén están a desenvolver un videoxogo interactivo co que entender o impacto que o cambio climático ten nos océanos. Legerén toma o exemplo de Assassin’s Creed, un título bastante popular que acabou por dar a coñecer distintas etapas da historia, e así explica as características destas novas narrativas á hora de divulgar.
Ciencia de Ida e Volta é un podcast en colaboración coa Unidade de Cultura Científica da UVigo (UCC+I) que conta co apoio da da Fundación Española para la Ciencia y la Tecnología, do Ministerio de Ciencia e Innovación.
