O longo Lovejoy e a pequena Dumbbell

Explicación: a retorta cola iónica do cometa Lovejoy, batida polo vento solar, estírase uns 3 graos ao través deste campo de vista telescópico, rexistrado o 20 de febreiro. O fondo estrelado inclúe a impresionante estrela azulada Phi Persei debaixo e a fermosa nebulosa planetaria M76 xusto enriba da longa cola do Lovejoy. Tamén coñecida como a nebulosa Pequena Dumbbell, por tras da súa brillante curmá M27 ou nebulosa Dumbbell, M76 está só a distancia equivalente do ancho dunha Lúa chea desde a verdecente coma do cometa. Este cometa Lovejoy (C/2014 Q2), aínda brillante nos ceos do hemisferio norte, esta a saír do sistema solar interior a uns 10 minutos luz ou 190 millóns de quilómetros da Terra. Pero realmente a Pequena Dumbbell está a entre 3 e 5 milleiros de anos luz de distancia. Agora, varrendo paseniñamente ao norte cara a constelación Cassiopeia, o cometa Lovejoy está a atenuarse máis lentamente do predito e aínda segue a ser un bo obxectivo para telescopios pequenos.