Explicación: por que hai unha liña brillante no ceo? Realmente, o que está fotografado enriba é unha galaxia de disco que se olla case perfectamente de canto. A imaxe procedente do Telescopio Espacial Hubble é unha lembranza visual espectacular de como de delgadas poden ser as galaxias de disco. NGC 4762, unha galaxia do veciño Cúmulo Virgo de Galaxias, é tan delgada que realmente resulta difícil de determinar que tipo de galaxia de disco é. Carece dun corredor visible de po que indique que se trata dunha galaxia lenticular de pouco po, aínda que é posible que unha vista desde a parte superior desvelase unha estrutura espiral. A estraña liña estelar abarca uns 100.000 anos luz de extremo a extremo. Preto do centro de NGC 4762 hai un lixeito vulto central de estrelas, mentres se poden ver moitas galaxias no fondo afastadas na distancia. As galaxias que semellan así de delgadas son moi raras debido a que a nosa Terra reside (case) nos planos extrapolados dos seus finos discos galácticos. As galaxias tan finas son relativamente comúns; por exemplo, pénsase que a nosa propia Galaxia da Vía Láctea sexa máis ou menos así de delgada.
