Únete á nosa canle de Whatsapp
Un sistema de control intelixente máis rápido, excelente e eficiente, que permite detectar as anomalías en tempo real das instalacións de control de líquidos. Este é o obxectivo do Traballo Fin de Máster en Informática Industrial e Robótica da Escola Politécnica de Enxeñería de Ferrol do investigador Álvaro Michelena Grandío, asociado ao Centro de Investigación TIC (CITIC) da Universidade de Coruña (UDC). Por este traballo, o estudante acaba de recibir o Premio Nacional Mellor TFM/TFG en Control Intelixente outorgado polo Comité Español de Automática (CEA), patrocinado pola empresa ASTI. O galardón, entregado no XVII Simposio de Control Intelixente do CEA, recoñece e estimula o traballo desenvolvido en relación ao control intelixente.
A proposta de Michelena xira arredor da aprendizaxe intelixente dos procesos de control de líquidos, entre eles a auga. Moitos destes procesos operan en continuo, sendo o controlador máis usado o PID (Proporcional-Integral-Derivativo) que require do axuste duns parámetros para o seu correcto funcionamento. Tradicionalmente, este axuste realizábase de forma empírica mediante sistemas que poden resultar lentos e pouco eficientes cando os sistemas para controlar non son lineais. É por iso que o proxecto realizado polo investigador do CITIC presenta unha solución que se basea na combinación de metodoloxía tradicional —como son os lazos de control PID autoaxustables e os algoritmos de identificación baseados en mínimos cadrados— cos máis recentes avances tecnolóxicos como son as redes neuronais e a aprendizaxe federada. Desta maneira, proponse simplificar a tarefa de identificación e control dos procesos non lineais de control do nivel de líquidos.
A proposta final
A proposta final de Álvaro Michelena Grandío permite obter un modelo xeral de comportamento do sistema, de modo que, á hora de identificar e controlar outros sistemas iguais, o proceso efectuarase automaticamente e de forma máis rápida, excelente e eficiente. Isto é así porque se parte dun coñecemento previo do funcionamento do proceso e, ademais, a solución deseñada permite realizar a detección de anomalías en tempo real, explica o investigador do CITIC, quen tamén forma parte do grupo de Ciencia e Técnica Cibernética da Escola Politécnica de Enxeñeira de Ferrol (EPIF) do Campus Industrial de Ferrol.
O Premio Nacional Mellor TFM/TFG en Control Intelixente CEA 2022 a Álvaro Michelena vén a sumar a outros recoñecementos recibidos polo investigador este ano como o Premio Cátedra Emalcsa-UDC. Michelena graduouse en 2020 en Enxeñería Electrónica Industrial e Automática da Universidade da Coruña, obtendo o premio extraordinario da UDC. Con todo, iniciou a súa actividade investigadora en 2019 na antiga Escola Universitaria Politécnica (EUP), actualmente Escola Politécnica de Enxeñería de Ferrol (EPEF) e desde maio 2021 forma parte do CITIC como técnico de apoio á investigación, colaborando con diferentes proxectos do centro. Así mesmo, desde decembro de 2021 é membro tamén do grupo de Ciencia e Técnica Cibernética da Escola Politécnica de Enxeñería de Ferrol do Campus Industrial de Ferrol.
