Fotonautas

Os 'Space Invaders' toman a Estación Espacial Internacional

Por

-

12/03/2015

Space Invaders na Estación Espacial Internacional — Lembran aquel famoso videoxogo matamarcianos de arcade dos Space Invaders? Saíu ó mercado en 1978 da man do xaponés Toshihiro Nishikado e marcou toda unha época, até convertirse nun dos videoxogos máis famosos da historia e precursor neste campo. Agora, os invasores do espazo chegaron á Estación Espacial Internacional (EEI). Inspirado naquel videoxogo, un pequeno e colorido mosaico foi atopado na EEI polo astronauta Samantha Cristoforetti, da Axencia Espacial Europea (ESA). O artista francés coñecido popularmente como Invader estableceu a súa obra alieníxena en máis de 60 cidades de todo o mundo, incluíndo Roma, París, Nova York, Manchester, Hong Kong e Los Ángeles. En 2012 enviou un mosaico á estratosfera nun globo. Despois da invasión da órbita da Terra, estes invasores do espazo foron vistos non só na EEI, senón tamén nos establecementos da ESA en toda Europa. Os primeiros invasores foron vistos no centro de astronautas da ESA en Colonia, Alemaña. Máis mosaicos víronse no Centro Redu da ESA en Bélxica, onde os satélites son controlados e probados como parte da rede de estacións da ESA. Crese, segundo informa a propia axencia europea, que Invader organizará máis invasións e activará máis extraterrestres noutros puntos da ESA durante todo o ano. O progreso desta invasión pode seguirse en Twitter a través dos hashtag #space2iss e #SpaceInvader. De volta no espazo, Samantha está a planear unir forzas con estas formas de arte pixeladas para inspirar aos nenos das escolas primarias no uso da súa imaxinación para combinar a xeometría, as cores e as matemáticas no minimalismo abstracto. / Foto: ESA.

DEIXAR UNHA RESPOSTA Cancelar a resposta

Este sitio emprega Akismet para reducir o spam. Aprende como se procesan os datos dos teus comentarios.