Hoxe en día xa non concibimos a realidade sen o noso teléfono móbil, que nos últimos anos se converteu nunha ferramenta case imprescincible no ámbito da comunicación interpersoal e da información. Segundo cifras da auditora Deloitte, o 94% da poboación española emprega este dispositivo a diario, dos cales o 62% teñen entre 18 e 24 anos. Un estudo desenvolvido na Universidad de Málaga (UMA), xunto a un centro italiano e outro estadounidense, amosou o xeito en que este uso continuado do móbil inflúe no xurdimento de novas patoloxías asociadas á doenza no dedo polgar. Este uso das novas tecnoloxías poderían derivar tamén nun cambio xeracional.
A tendinite do i-Phone
Segundo a profesora do departamento de Fisioterapia da UMA, Raquel Cantero, existe unha relación directa entre a ocupación da persoa e a orixe da dor no polgar. Deste xeito, as actividades que realizamos de forma diaria están a xerar cambios na posición física deste dedo, o que podería influir na súa propia evolución futura.
“As enfermidades están cambiando”, afirma Cantero: “Nas consultas, cada vez máis, atopámonos con polgares atrofiados; fálase incluso da tendinite do i-Phone”. Neste sentido, a experta sinala que, dende pequenos, a pinza da man xa non se utiliza tanto; incluso nos propios colexios, as pantallas táctiles substitúen ás veces á escritura, co consecuente desuso do polgar tamén neste ámbito.
Cantero pon o exemplo da evolución do cerebro do primate ao baixar dos árbores e comenzar a empregar a man para outras funcións: “Do mesmo xeito que aconteceu no cerebro do primate, cando ao baixar das árbores a súa estrutura cerebral foi mudando a medida que a man empezaba a usarse para outras funcións diferentes, tamén nos preguntamos se o paso do tempo podería deixar esa pegada na actualidade co cambio do uso do polgar, o dedo clave na presión e funcionalidade da man nos seres humanos”.
Referencia: The hominid thumb and its influence on the employment during evolution (Publicado en Reumatismo).
