Hai 40 anos, o 24 de novembro de 1974, apareceu Lucy, o esqueleto fosilizado case completo dun homínido da especie Australopithecus Afarensis, de 3,2 millóns de anos de antigüidade, descuberto polo estadounidense Donald Johanson a 159 quilómetros ao sur de Adís Abeba, en Etiopía. A achega que fixo Lucy ao coñecemento da evolución foi espectacular. Ata ese ano non existían probas claras de bipedismo en ningunha especie con máis de 2 millóns de anos de antigüidade. Astralophitecus afarensis viviu en África hai 3,2 millóns de anos, e é un dos homínidos máis antigos que se coñecen. E sabemos que camiñaba ergueita, polo que Lucy pertence ó punto en que os homínidos comezaron a ter unha aparencia máis humana que simia. A famosa Lucy consérvase nunha caixa forte en Adis Abeba e hai reproducións do seu esqueleto nos máis grandes museos de historia natural. É toda unha celebridade. O seu nome tamén ten historia. Johanson e o seu equipo barallaban algúns nomes femininos cando comezou a soar na radio do campamento 'Lucy in the Sky with Diamonds', de The Beatles. Lucy foi o nome escollido case por unanimidade.
Fotonautas

Lucy, de 3,2 millóns de anos, cumpre 40