Intelixencia artificial é un dos conceptos que máis se repite ultimamente nos medios. Acapara portadas de xornais e aparece na televisión en prime time. Pero tamén protagoniza conversacións cotiás. Quen non probou xa Chat GPT? Este é o mellor exemplo do que poden ofrecer os sistemas de intelixencia artificial pero, tamén, dos riscos que supón. Como enfrontan nas escolas redaccións feitas con este chatbot? Ou artigos científicos dentro da academia?
Abordamos todas estas cuestións en O recuncho da IA, o novo pódcast de GCiencia en colaboración con atlanTTic, o Centro de Investigación en Tecnoloxías de Telecomunicación da Universidade de Vigo. Da man dos investigadores José Luis Alba, Rebeca Díaz, Jaime González e Andrea Busto tratamos de entender para que serve a intelixencia artificial e como mellora a nosa vida. Así mesmo, como se poden corrixir os nesgos de xénero que deturpan os algoritmos, ou os intereses comerciais que se agochan detrás destes. Finalmente, analizamos ata que punto os modelos de intelixencia artificial poden por en risco ou prexudicar as linguas minorizadas, como o galego.
Episodio realizado por Laura Filloy
Edición: Carlos Tresandí
Escoita O recuncho da IA nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
