O Centro de Investigación en Tecnoloxías de Telecomunicación da Universidade de Vigo, atlanTTic, desenvolveu o asistente de conversación Celia para combater a soidade non desexada entre as persoas de idade avanzada e detectar de forma precoz enfermidades neurodexenerativas. Celia xa está dispoñible de forma gratuíta a través de WhatsApp para todas aquelas persoas que queiran empezar a probalo.
O proxecto liderado por Francisco Javier González Castaño busca dar resposta a dous dos retos máis complexos que afronta a sociedade actual. Como explica o investigador Pablo Campos: “Trátase dun proxecto innovador de intelixencia artificial co que mellorar a calidade de vida das persoas de idades avanzadas en varios contextos, o emocional e o sanitario”.
A intelixencia artificial ao servizo das persoas
Segundo os datos do Intituto Nacional de Estatítica (INE), en España hai un total de 9,7 millóns de persoas maiores de 65 anos, e as previsións sinalan que nas próximas décadas ascenderá ata os 15 millóns. Destas persoas, actualmente máis de 2 millóns viven soas, e esta cifra aumentará ata os 7 millóns en 20 anos. Por outra banda, na actualidade non existen mecanismos efectivos de detección temperá para enfermidades cognitivas como o alzhéimer ou a demencia. Con todo, comprobouse que o tratamento en etapas iniciais pode axudar a atrasar a súa progresión e a mellorar a calidade de vida destes pacientes.
Ante este contexto, un equipo de atlanTTic traballa desde hai cinco anos para dar resposta a ambos retos. Da valorización destes traballos nace Celia, o primeiro asistente de conversación que permite o uso da voz e pon á intelixencia artificial ao servizo das persoas.
O asistente foi deseñado para acompañar, conversar e entreter con empatía a persoas de idade avanzada, ao mesmo tempo que monitoriza a saúde cognitiva dos seus usuarios a través da análise da linguaxe e a voz. Neste sentido, comprobouse que a voz é unha ferramenta biométrica cuxos parámetros permiten monitorizar enfermidades neurolóxicas, emocionais ou cardiorespiratorias, polo que no futuro ampliarase o número de enfermidades a controlar mediante estas ferramentas de intelixencia artificial. Ademais, e a diferenza doutros asistentes que hai no mercado, comunícase cos seus usuarios sen esperar unha orde.
Podes acceder a Celia a traves desta ligazón ou agregando o contacto 655 64 14 45 ao teu teléfono para iniciar unha conversación de Whatsapp.
