As rexións escuras e sombrías da Lúa fascinan tanto aos astrónomos coma aos fans de Pink Floyd. O eixe de rotación do noso satélite natural inclinouse 1.5 º, o que significa que nos seus polos hai puntos que nunca ven a luz do Sol. O fondo dalgúns cráteres, por exemplo, sempre está en sombra. Esta imaxe mosaico, difundida hoxe pola Axencia Esppacial Europea (ESA), obtida co instrumento Advanced Moon Imaging Experiment da nave SMART-1, mostra unha rexión salpicada de cráteres no polo Sur da Lúa. Obtida durante o verán do hemisferio sur lunar entre decembro de 2005 e marzo de 2006, a imaxe está composta por unhas 40 fotos individuais que cobren unha área de 500 x 150 km. Os cráteres na imaxe son (de dereita a esquerda e a partir da maior forma circular): Amundsen, Faustini, Shoemaker, Shackleton e de Gerlache. Amundsen, de 105 km de diámetro, é o maior do grupo.
