Unha abraiante manobra de dous hidroavións de extinción de incendios na ría de Aldán esta tarde, no operativo contra o lume declarado moi preto dunha urbanización en Punta Couso, no Morrazo.
Os hidroavións amerizan case simultáneamente, nunha arriscada operación na que chegan a estar moi próximos mentres recollen auga do mar na ría de Aldán para sofocar o lume.
É a segunda vez que arde Punta Couso despois de que o sábado outro lume devorara cinco hectáreas. Durante a noite do sábado e durante todo o domingo os bombeiros da Xunta ocupáronse de arrefriar ben a zona e mesmo este luns pola mañá examinaron a zona, sen que se advertise perigo. Con todo, ás 16:44 horas, con vento do norte, o incendio volveu reproducirse, ameazando a urbanización de 16 vivendas unifamiliares.
Nesta ocasión, o incendio saíu fóra da urbanización nunha lingua de lume de 2.000 metros. Ao redor das 18.30 horas considerouse controlado, grazas a operacións como a que observamos neste abraiante vídeo dos dous hidroavións en acción.