Únete á nosa canle de Whatsapp
Os animais mariños adoitan deixar estampas fermosas na costa galega, en forma de chimpos ou paseos que alegran a vista de quen ten a sorte de velos. Porén, a natureza moitas veces non é amable, e así se pode constatar nas imaxes difundidas este luns polo Instituto para a Investigación dos Arroaces (BDRI, polas súas iniciais en inglés) con base no Grove. O vídeo, gravado o 12 de setembro do pasado ano desde unha embarcación de recreo, amosa o ataque dun grupo de arroaces (Tursiops truncatus) a un golfiño común (Delphinus delphis).
Desde o BDRI están a analizar a secuencia para obter máis detalles sobre os feitos. O grupo de arroaces, composto por nove individuos (5 machos e 2 femias coas súas crías) foi observado polo equipo do Instituto durante varias horas, ata que se moveu cara a costa norte da ría de Arousa. Entón, cando se atoparon cun grupo de golfiños comúns, os arroaces “conseguiron illar a un golfiño común e agredilo de forma continuada durante 30 minutos”, segundo conta nas redes o BDRI.
O ataque foi fatal, xa que acabou co “desenlace do golfiño común aboiando na superficie, posiblemente morto por mor das agresións”. Un comportamento que, segundo os investigadores, “aseméllase moito aos casos de infanticidio estudados polo noso equipo en Galicia e as agresións de golfiños mulares cara ás marsopas no Reino Unido e California”.
Por agora, as causas do ataque dos arroaces non se coñecen, aínda que desde o BDRI apuntan “á alta superposición das dúas especies dentro da ría observada neste período, o que resultaría nunha maior competición polos recursos alimenticios“. Alén disto, “os niveis elevados de testosterona nos machos durante o mes de setembro tamén poderían influenciar o comportamento dos individuos, ao ser estes, os machos, os causantes do maior número de agresións contra o golfiño común”, engaden os investigadores.
Este tipo de ataques entre especies non adoitan captarse, polo que o documento cedido ao BDRI por Francisco Redondo é dun importante valor científico. “É grazas a estas observacións casuais realizadas por amantes do mar que entre todos poderemos coñecer mellor este mundo mariño tan interesante como descoñecido”, conclúen.
Moi interesante