As arañas das familias dos terídidos, unha especie espallada por todo o mundo, cunha gran diversidade de máis de 2200 especies e preto de 90 xéneros coñecidos, non destacan precisamente polo seu tamaño. Distan moito das especies de licósidos, como as tarántulas, que superan amplamente os 10 centímetros de diámetro. Pero como outros tipos de araña, teñen nas súas estratexias de caza un aliado que as fai capaces de derrotar a animais moito meirandes. E isto é o que constata un novo estudo publicado no Journal of the Royal Society Interface, do que se fai eco a revista Science: nel descríbese como tres especies de terídidos dun tamaño milimétrico son capaces de atrapar a insectos 50 veces máis pesadas ca elas manipulando os fíos das súas teas.
Os investigadores observaron como atrapaban cucarachas de diferentes tamaños no laboratorio. Utilizando como sostén a forte estrutura das teas, empezaron a reforzar a mesma pegando novos fíos no corpo do insecto. A novidade é que ata este achado, os científicos descoñecían os mecanismos que permitían a estes arácnidos levantar presas moito máis pesadas.
Ao observar o traballo da araña viuse que estes bechos suben e baixan repetivamente pola tea, collendo algúns fíos tensados, e únenos á presa. A enerxía elástica dos fíos funciona ao xeito dunha roldana, o que facilita levantar esta pesada carga. É deste xeito como a diminuta araña pode atrapar todo tipo de insectos, e mesmo outros animais como pequenos réptiles e roedores, a pesar de que non dispoñen da forza precisa para facelo. Pero si teñen a maña.
Referencia: How spiders hunt heavy prey: the tangle web as a pulley and spider’s lifting mechanics observed and quantified in the laboratory (Publicado no Journal of the Royal Society Interface).