A ave australiana que chía igual ca un bebé, unha cámara ou unha motoserra

É sobradamente coñecida a habilidade dalgunhas especies de aves para replicar sons semellantes aos que emiten os humanos. Ben o saben, por exemplo, en Pontevedra, onde o papagaio Ravachol é un auténtico emblema da cidade e mascota do Entroido, célebre por frases como “se collo a vara…”, que pronunciaba na botica de Perfecto Feijoo, onde pasaba os seus días. Porén, o abano de sons é sorprendentemente amplo, e así o demostra un vídeo gravado no zoolóxico de Taronga, en Sydney (Australia). A que recorda este son?

O protagonista é un exemplar de Menura novaehollandiae, coñecida como ave lira soberbia. E efectivamente, esta especie ten unha enorme habilidade para recrear son de ata máis de 20 aves distintas. A ave lira soberbia xa chamou a atención no seu momento do gran documentalista David Attenborough, que nun dos seus documentais amosaba a este animal reproducindo os sons do obturador dunha cámara, o movemento do carrete dentro dela ou mesmo o ruído dunha motoserra:

Con todo, o son que recrea o pranto dun bebé humano sorprendeu máis se cabe aos traballadores do zoolóxico australiano. Segundo contaron os traballadores do zoo a The Guardian, con toda probabilidade desenvolveu a habilidade despois de escoitar a algún bebé que visitaba o lugar. Unha das traballadoras, Leanne Golebiowski, dixo que o exemplar, que leva por nome Echo, é capaz de imitar igualmente un trade eléctrico ou a alarma de incendios do zoolóxico. Mesmo pode emitir a orde “evacúen agora mesmo” que inclúe a alarma.

Segundo as investigacións realizadas, a imitación dos cantos doutras especies por parte dos machos da ave lira soberbia é unha estratexia de cortexo por parte dos machos, aínda que tamén se postulou que as femias teñen a capacidade de reproducir diversos sons na procura de alimento ou como defensa do niño. Ademais, adquiren a capacidade de reproducir sons que se producen na contorna onde viven, de aí as curiosas escenas que teñen lugar cando comparten espazo coa actividade humana.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.