Venres 29 Marzo 2024

Un estudo da USC confirma que a pesca recreativa beneficia a saúde de quen a practica

É o primeiro artigo que establece unha asociación positiva entre esta actividade e o benestar físico e mental dos seus practicantes

Como contribúe a práctica da pesca marítima recreativa á saúde e ao benestar das persoas que realizan habitualmente esta actividade? É unha pregunta que, ata agora, non tiña resposta científica. No caso de Galicia, onde unhas 70.000 persoas (case o 3% da poboación) practican a pesca recreativa, contestar a esta pregunta non carece de importancia. Un equipo de persoal investigador, entre os que se atopan Pablo Pita, Sebastián Villasante, Gillian Ainsworth e Manel Antelo, da Universidade de Santiago de Compostela, acaban de publicar un artigo na revista Ecosystems and People que constitúe “o primeiro estudo que achega evidencia empírica sobre os beneficios para a saúde e o benestar dos pescadores asociados á práctica desta actividade”.

O traballo baséase en cuestionarios realizados a case 250 persoas que realizan pesca recreativa en Galicia, nos que se avaliaron as asociacións desta actividade con niveis de estrés, o consumo de peixe e marisco e a calidade do sono nocturno. Entre outros achados, o artigo mostra que no caso das persoas máis activas, “os índices de estrés reducíronse ata un 15,4% en relación ás menos activas”. “Amosamos que a práctica da pesca recreativa está asociada a menores niveis de estrés, segundo a percepción dos propios pescadores”, explican os autores do traballo. E engaden, na mesma liña, que “tamén demostramos que os pescadores recreativos máis activos consomen máis marisco na súa dieta”.

Publicidade

Beneficios para a saúde pública

Estes achados reforzan a idea de que a promoción de actividades recreativas ao aire libre repercute positivamente no benestar colectivo da poboación. Os autores do traballo afirman que “a pesca marítima recreativa é unha actividade relativamente barata e accesible, incluídas as persoas maiores, xa que non require un esforzo físico considerable”. Os potenciais beneficios colectivos son notables nas sociedades máis desenvolvidas, cunha poboación envellecida, xa que uns niveis máis elevados de benestar e saúde implicarían unha menor carga asistencial para os sistemas públicos de saúde.

As vantaxes esténdense tamén, por exemplo, ao ámbito alimentario: as persoas que practican a pesca marítima recreativa consomen unha maior proporción de produtos do mar que o resto da poboación, recibindo así unha achega de nutrientes que axudan a previr problemas cardiovasculares, respiratorios e mentais, ademais doutras patoloxías como o cancro. Estes resultados, segundo o equipo investigador, “constitúen a base para desenvolver posteriores investigacións sobre este asunto” e “reverter a notable ausencia” de estudos sobre o vínculo entre a pesca recreativa e a saúde e o benestar das persoas. Lembran que se trata dunha actividade que practican case 60 millóns de persoas en todo o mundo, e que xera uns 30.000 millóns de dólares anuais a través dos gastos e investimentos do colectivo de pescadores recreativos. Boa parte das persoas que practican a pesca marítima recreativa teñen unha idade superior á media da poboación, o que contribúe así a aumentar os anos de vida saudable para moita xente.

Fenda de xénero

Por outra banda, o artigo tamén fai fincapé na fenda de xénero, cuestión que o equipo de investigación da USC analiza dende hai tempo. Tendo en conta que só o 1% dos pescadores recreativos son mulleres, os autores consideran que “implicar máis mulleres na pesca recreativa aumentaría os beneficios sociais derivados dunha mellor saúde e benestar da poboación”.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

As plantas non nativas aceleran a desaparición dos ameneiros galegos

As árbores centroeuropeas que se importan para restaurar as plantacións afectadas por unha doenza fúnxica producen uniformidade xenética

Un novo método da USC axudará a combater o furtivismo marisqueiro en Galicia

Tres investigadores estiman que entre 2012 e 2020 máis de 1.700 persoas extraeron de forma ilegal 660 toneladas de marisco

Investigadoras galegas constatan que as mulleres autistas camuflan máis os seus síntomas

O enmascaramento provoca retrasos no diagnóstico e problemas de saúde mental derivados da presión social

Un equipo galego sinala os lípidos en sangue como biomarcadores de covid persistente

Investigadores do CiQUS ofrece unha nova perspectiva sobre a natureza desta enfermidade e abre a porta a diagnósticos e tratamentos máis específicos