Venres 29 Marzo 2024

Arranca o doutorado no Campus da Auga de Ourense con 25 prazas

Co 100% do seu primeiro plan estratéxico de actuación completado con éxito, o proxecto de especialización do campus de Ourense, o Campus da Auga, vén de presentar este luns o que é o seu primeiro gran produto académico: o Programa de Doutoramento Auga, Sustentabilidade e Desenvolvemento, que se implantará no curso 2017/2018. Esta oferta académica nace avalada por 134 investigadoras e investigadores da Universidade de Vigo, do Instituto Politécnico do Porto e da Universidade de Trás-os-Montes e Alto Douro e co obxectivo de ser un programa capaz de ofrecer unha formación avanzada e de elevada calidade en temáticas propias do Campus da Auga, contando coa participación multidisciplinar de todas as escolas e facultades do campus ourensán. “Este doutoramento convértese no primeiro e máis ambicioso obxectivo acadado. É a punta de lanza do noso proxecto de especialización como Campus da Auga”, destacou Virxilio Rodríguez, vicerreitor do campus de Ourense, durante a súa presentación.

Presentación do novo doutorado.
Presentación do novo doutorado.

A nova oferta académica da Universidade de Vigo foi presentada por Virxilio Rodríguez, vicerreitor do campus de Ourense; Francisco Javier Rodríguez Rajo, coordinador do Programa de Doutoramento do Campus da Auga Auga, Sustentabilidade e Desenvolvemento, e Susana Álvarez, secretaria da comisión académica encargada de deseñar este doutoramento. Destacando a “singularidade” e a “potencia” deste programa, o vicerreitor do campus de Ourense salientou durante o acto “o orgullosos que estamos xa de ter acadado este éxito”. Foron, apuntou, case tres anos de “moito traballo” polo que quixo agradecer de xeito especial o esforzo realizado polos membros da comisión académica que participou na elaboración do programa e dos centros e persoal investigador implicados. “Despois de tres anos podemos dicir que temos un campus que podemos cualificar xa de especializado”, afirmou Virxilio Rodríguez.

Publicidade

Segundo explicou Susana Álvarez na presentación, esta nova oferta nace co obxectivo de dotar ao proxecto de especialización do campus de Ourense dun programa de doutoramento. A existencia deste programa, apuntou, permitirá o incremento tanto “de doutores altamente cualificados” como de publicacións científicas e ofertas de posgrao especializadas nas temáticas de interese do Campus da Auga. No seu deseño, indicou, “o encargo foi claro: contar con todo o mundo que quixera participar do campus, abrilo a toda a Universidade de Vigo e logo intentar na medida do posible a internacionalización”. Tendo en conta estas premisas e o contexto no que nace, a secretaria da comisión académica salientou que a posta en marcha deste programa no curso académico 2017/2018 é “un éxito de todos os investigadores e investigadoras”.

Participan o Instituto Politécnico do Porto e a Universidade de Trás-os-Montes

O Programa de Doutoramento do Campus da Auga Auga, Sustentabilidade e Desenvolvemento, detallou Francisco Javier Rodríguez Rajo, oferta 25 prazas para o curso 2017/2018. Para o seu desenvolvemento contará cunha masa investigadora composta por 101 investigadores e investigadoras da Universidade de Vigo, 21 do Instituto Politécnico do Porto e 12 da Universidade de Trás-os-Montes e Alto Douro. Trátase, subliñou o director do doutoramento, dun panel que destaca pola súa “capacidade formativa”, apuntando cifras de conxunto como a dirección no período 2011/2015 de 196 teses, unha media de 2,3 sexenios e 1,5 millóns de euros captados. Na elaboración deste programa, apuntou Rodríguez Rajo, aglutináronse as seis áreas de especialización do Campus da Auga (xestión; innovación social e educativa; medio ambiente; TIC; turismo e patrimonio cultural e alimentación) en tres bloques temáticos, como son Auga, Sustentabilidade e Desenvolvemento, seguindo a mesma división para o colectivo de investigadores e investigadoras.

O primeiro bloque, o da Auga, conta coa participación de 37 investigadores e investigadoras da Universidade de Vigo, 5 do Instituto Politécnico do Porto e 7 da Universidade de Trás-os-Montes e Alto Douro. As liñas de investigación neste eido serán o réxime xurídico da auga; a calidade da auga e os seus ecosistemas; a investigación e aplicacións das augas e augas termais e o turismo, patrimonio cultural e auga. O segundo eixe é o de Sustentabilidade e nel agrúpanse 36 investigadores e investigadoras da Universidade de Vigo, 9 do Instituto Politécnico do Porto e 4 da Universidade de Trás-os-Montes e Alto Douro. As súas liñas de traballo son o réxime xurídico do medio ambiente e súa sustentabilidade; a produción primaria sostible; a xestión sostible e o cambio climático e recursos hídricos. Por último estaría o eixe de investigación en Desenvolvemento, no que participan 35 investigadores e investigadoras da Universidade de Vigo e un do Instituto Politécnico do Porto. Neste caso, a investigación centrarase en temas como dereito, TICs e desenvolvemento; alimentación e desenvolvemento e desenvolvemento turístico asociado ao patrimonio e á saúde. Os investigadores e investigadoras que se matriculen neste programa de doutoramento do Campus da Auga terán un prazo de tres ou cinco anos para a presentación da tese, segundo se dediquen a tempo completo ou parcial a esta tarefa.

O director do programa de doutoramento quixo durante a súa intervención “agradecer ás facultades e escolas o grande esforzo feito e apoio dado a todo este proceso”. Unha vez acadados todos os avais e superados todos os trámites, subliñou Rodríguez Rajo, ábrese agora unha etapa “moi ilusionante” que de seguro “nos vindeiros anos nos dará moitísimas alegrías”. Para aqueles investigadores e investigadoras que estean interesados en matricularse neste programa o vindeiro curso académico, o seu responsable lembrou como o 25 de agosto ábrese o prazo de preinscrición. As expectativas de matrícula, indicou, son boas para este primeiro ano tendo en conta as mostras de interese xa recibidas.

1 comentario

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

As cinzas dos lumes de 2017 poden causar alteracións no plancto costeiro da Vigo

O estudo realizado por investigadores do CIM da Universidade de Vigo centra a súa investigación na escorredura posterior ás queimas

A falsa endemia de malaria e outros intentos para desecar a lagoa de Antela

A partir do século XVIII a zona húmida foi considerada inimiga da agricultura. Os veciños intentaron evitar o desaugamento das terras que utilizaban para o pastoreo

Os bioplásticos e polímeros sintéticos teñen realmente capacidade de biodegradación?

O proxecto Polbio nace para determinar se este proceso pode ter algún efecto tóxico en ambientes terrestres e acuáticos

Un método estatístico permite detectar por primeira vez que liñaxes celulares evolucionan máis rápido

O estudo, no que colabora a Universidade de Vigo, axudaría a identificar mutacións con incidencia en enfermidades como o cancro