Únete á nosa canle de Whatsapp
Haberá Selectividade, pero non nos prazos inicialmente previstos. A proba de acceso á Universidade, EBAU, atrasarase. Así o decidiron este martes o Ministerio de Educación, o Ministerio de Universidades, a Conferencia de Reitores e as Comunidades Autónomas nunha reunión telemática que durou máis de seis horas. Uns 300.000 estudantes de segundo de Bacharelato estaban pendentes desta proba. Uns 12.000 alumnos galegos poderían concorrer a estes exames na convocatoria do 2020.
A nova data do exame aínda non se decidiu e dependerá da duración do estado de alarma e do que dure a suspensión das clases físicas. A data máxima para celebrar as probas da EBAU estaba fixada no 19 de xuño antes da crise do coronavirus, con todo, na actual circunstancia non daba tempo a mantela no caso de que se prolongase a alerta.
A intención de Ministerio, Consellería e Reitores é que a Selectividade poida celebrarse este ano, aínda que a data pasa a ser agora unha incógnita.
O Secretario de Estado de Educación, Alejandro Tiana, garantiu que “as probas de avaliación faranse con criterios de equidade e xustiza e @teniendo en cuenta a situación excepcional pola que se está pasando”.
Ademais, desde o Ministerio de Educación difundiron unha nota que di que “ningún alumno vai perder o curso pola suspensión das clases presenciais debido ao coronavirus”.
