Xoves 28 Marzo 2024

A start-up galega Senseitrade lanza o seu primeiro torneo mensual de bolsa

A start-up galega Senseitrade lanza esta semana o seu primeiro torneo mensual de bolsa, unha competición coa que quere dar a coñecer a súa aplicación móbil, capaz de recomendar os valores nos que convén investir utilizando a información que circula nas redes sociais en tempo real. Senseitrade, gañadora do certame de aceleración de empresas Vía Galicia na súa edición de 2015, acaba de instalarse no Parque Tecnolóxico de Galicia-Tecnópole, en San Cibrao das Viñas (Ourense) para desenvolver o seu proxecto de negocio.

Os creadores da app, que leva o mesmo nome que a súa empresa, detectaron que as redes sociais, e en especial Twitter, son capaces de precipitar cambios significativos na bolsa. “O mercado móvese cada vez máis a ritmo de tuits, de informacións a curto prazo, e cremos que o investidor minorista pode aproveitar o coñecemento sobre estes movementos”, explica David Conde, CEO e cofundador de Senseitrade, antes Twibex35.

Publicidade

Hoxe luns a empresa lanza o seu I Torneo Mensual de Bolsa a través da súa app, que ten unha nova versión dispoñible para descarga gratuíta tanto para Android como para IOS. O usuario que máis diñeiro virtual logre acumular operando coa aplicación levará un iPad mini. “Este será o primeiro dunha serie de desafíos que lanzaremos ao longo do ano 2017 para que os usuarios poidan gañar premios mentres aprenden a investir en bolsa”, anuncia Conde.

A empresa sostén que se pode predicir a evolución dos valores cun 87 por cento de acerto

A idea deste equipo de emprendedores, formado por un economista e catro enxeñeiros, partiu dun estudo da Universidade de Munich que, tras analizar máis de 250.000 tweets sobre bolsa, conclúe que se pode predicir a súa evolución cun 87% de acerto.

A partir da análise das redes sociais, Senseitrade ofrece unha serie de funcionalidades para que calquera persoa poida acceder ao investimento en bolsa sen ser un experto. Ademais de permitir comezar a operar cunha conta demo (con diñeiro virtual), os seus sinxelos indicadores fan posible saber de maneira intuitiva se é un bo momento para comprar ou vender.

Os promotores de Senseitrade aseguran que a súa ferramenta non só é interesante para investidores que están a empezar, senón tamén para os profesionais que utilizan outras ferramentas de análise de bolsa pero que queren confirmar as súas previsións con información do que se está comentando nas redes sociais.

Tras gañar o concurso convocado pola aceleradora Vía Galicia, apoiada pola Zona Franca de Vigo e a Xunta, a empresa recibiu unha subvención a fondo perdido e dous préstamos participativos para o desenvolvemento de negocio. O seu obxectivo é activar unha rolda de financiamento en 2017, para o que xa está en contacto con varios fondos de investimento nacionais. O seu modelo de negocio baséase na subscrición, que permite o acceso aos servizos de análise en tempo real e as alertas de compra ou venda en bolsa.

 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

CoinsCrap: o aforro a través do consumo

Unha aplicación para móbiles que te axuda a aforrar gardando o teu solto electrónico virtual

Senseitrade, un termómetro bolsista das redes sociais creado en Galicia

A aplicación desenvolvida por esta empresa analiza os mensaxes en internet para predicir cal é o mellor momento para mercar ou vender accións na bolsa

O CiQUS da USC convoca 15 bolsas de verán para estudantes de grao

Un ano máis, o Centro Singular de Investigación en Química Biolóxica...

O CITIUS de Santiago ofrece cinco bolsas de verán para investigadores

Os estudantes que teñan rematado o terceiro curso do grao en...